အတွေးမလွန်စေချင်ပါ

ဒီကနေ့အတွက် အတွေးမလွန်စေချင်ပါဆိုတဲ့အကြောင်းအရာလေးကိုတင်ဆက်ပေးလိုက်ပါတယ်။အကြောင်းအရာတစ်ခုကို မကောင်းတဲ့ဘက်ကနေ ထပ်ခါထပ်ခါ တွေးနေတာကို အတွေးလွန်တယ်လို့ ခေါ်ပါတယ်။ဖြစ်ပြီးသားကိစ္စကနေ မရုန်းထွက်နိုင်ဘဲ အတွေးလွန်နေခြင်းနဲ့ မဖြစ်ရသေးတဲ့ကိစ္စကို ကြိုတင်စိုးရိမ်ပူပန်ပြီး အတွေးလွန်နေခြင်းဆိုပြီး အတွေးလွန်တဲ့ပုံစံ နှစ်မျိုးရှိပါတယ်။အတွေးလွန်ခြင်းမှာ နောက်ဆက်တွဲဆိုးကျိုးတွေ အများကြီးပါ။1. စိတ်ဖိစီးမှု အလွန်အမင်း မြင့်တက်လာမယ်။2. မှန်မှန်ကန်ကန် ဆုံးဖြတ်နိုင်စွမ်း လျော့နည်းလာမယ်။3. မှတ်ဉာဏ်မကောင်းတော့ဘဲ မေ့လျော့လာမယ်။4. အားငယ်စိတ်တွေ ပိုများလာမယ်။ 5. ကိစ္စတိုင်းကို မကောင်းတဲ့ဘက်ကချည်း စဉ်းစားလာမယ်။6. အရာရာကို လွယ်လွယ်ကူကူ အရှုံးပေးလာမယ်။7. အိပ်ပျော်ဖို့ ခက်ခဲလာမယ်။8. အစာစားလိုစိတ် ပျောက်ဆုံးလာမယ်။9. နှလုံးရောဂါ ရလာမယ်။10. စိတ်ရော ကိုယ်ပါ ပင်ပန်းဆင်းရဲလာမယ်။အဆုံးမှာ သတ်သေတဲ့အထိ အခြေအနေ ဆိုးနိုင်ပါတယ်။အတွေးလွန်ခြင်းဟာ ကျွန်တော်တို့ကြုံနေရတဲ့ ပြဿနာတွေအတွက် မှန်ကန်တဲ့အဖြေကို မပေးပါဘူး။ တန်ဖိုးရှိတဲ့အချိန်တွေကို ဖြုန်းတီးရာရောက်ပါတယ်။ ကျွန်တော်တို့ရဲ့ဘဝကိုလည်း အောက်ဆုံးထိရောက်အောင် ဆွဲချနိုင်ပါတယ်။ လူမှုရေး၊ ပညာရေး၊ စီးပွားရေး၊ အချစ်ရေး၊ ဘယ်ကိစ္စမှာမဆို အတွေးလွန်ခြင်းက ကျွန်တော်တို့ကို ဒုက္ခရောက်စေနိုင်ပါတယ်။ ဒါကြောင့် အတွေးလွန်တတ်တဲ့စိတ် ရှိနေပြီဆိုရင် မဖြစ်မနေကုသဖို့ လိုအပ်ပါတယ်။ အတွေးလွန်ခြင်းကနေ ရုန်းထွက်နိုင်မယ့် နည်းလမ်းကောင်းတွေကို ဝေမျှပေးချင်ပါတယ်။1. မအိပ်ခင်မှာ ပျော်စရာအကြောင်းတွေပဲ တွေးကြည့်ပါ။ အိပ်ရာနိုးရင်လည်း ပျော်စရာကိစ္စကိုပဲ စပြီးတွေးပါ။ နေ့တစ်နေ့ရဲ့ အစနဲ့ အဆုံးမှာ မကောင်းတဲ့အကြောင်းတွေ လုံးဝ မတွေးပါနဲ့။2. အတိတ်က မကောင်းတဲ့ကိစ္စတွေကို ပြန်မတွေးမိအောင်နေပါ။ အနာဂ္ဂါတ်ကိုလည်း ဘယ်တော့မှ ကြိုပြီး မစိုးရိမ်ပါနဲ့။ လက်ရှိအခြေအနေမှာပဲ အကောင်းဆုံးရှေ့ဆက်ဖို့ ကြိုးစားကြည့်ပါ။3. ဘယ်သူမှ (perfect) မဖြစ်ဘူးဆိုတဲ့ အသိကို ခေါင်းထဲထည့်ထားပါ။ လောကကြီးမှာ အမှားကင်းတဲ့သူ၊ အပြစ်ကင်းတဲ့သူ၊ အားနည်းချက်ကင်းတဲ့သူဆိုတာ မရှိပါဘူး။4. အတွေးမလွန်ဖို့ သတိကပ်ထားပါ။ တစ်ခုခုကို (၅) မိနစ်ထက် ပိုတွေးနေမိပြီဆိုတာနဲ့ အဲ့ဒီအတွေးကို ဖြတ်တောက်လိုက်ပါ။ ပြီးရင် တစ်ခုခုလုပ်ပြီး အာရုံပြောင်းပါ။
5. ဘယ်အရာမဆို လုပ်နိုင်တယ်ဆိုတဲ့ ယုံကြည်ချက်ထားပါ။ မှားရင် ပြန်ပြင်မယ်။ လဲကျရင် ပြန်ထမယ်။ မလိုအပ်တာတွေ မစိုးရိမ်ပါနဲ့။ ကြိုမတွေးပါနဲ့။ ခွန်အားရှိသမျှသာ ကြိုးစားပါ။6. ဘယ်ကိစ္စမှာမဆို အကောင်းမြင်စိတ်မွေးပါ။ အကောင်းဘက်က တမင်လှည့်တွေးပါ။ အကောင်းမြင်ခြင်းက ကြီးတဲ့ပြဿနာကို သေးစေပြီး သေးတဲ့ပြဿနာကို ပပျောက်သွားစေပါတယ်။7. တစ်ယောက်တည်းမနေပါနဲ့။ မိသားစု၊ သူငယ်ချင်းတွေနဲ့ အဆက်အသွယ်ရှိနေပါစေ။ စိတ်ညစ်စရာတွေကို ရင်ဖွင့်ပါ။ သူတို့နဲ့ တိုင်ပင်ပါ။ အကြံဉာဏ်ယူပါ။8. နေ့တိုင်း ကိုယ်ဝါသနာပါတာကို အနည်းဆုံး မိနစ် (၃၀) လုပ်ပါ။ TV ကြည့်တာ၊ game ဆော့တာ၊ ပန်းချီဆွဲတာ၊ သီချင်းဆိုတာ၊ ဘာပဲဖြစ်ဖြစ် လုပ်ပြီး စိတ်ကို ပျော်အောင်ထားပါ။9. နေ့တိုင်း အားကစားတစ်ခုခုလုပ်ပါ။ (Gym) ဆော့နိုင်ရင် အကောင်းဆုံးပါပဲ။ အားကစားလုပ်ခြင်းက စိတ်ရောကိုယ်ပါ ကျန်းမာစေပါတယ်။10. အစားကို အချိန်မှန်မှန်စားပါ။ ရေလည်း များများသောက်ပါ။ ညဘက် (၁၁) နာရီဆို မကောင်းတာတွေ မတွေးပဲ အိပ်ပါ။ (၈) နာရီပြည့်အောင် အိပ်ပါ။ကျွန်တော်လည်း အခုဆိုရင် ဘာကိစ္စကိုမှ အတွေးမလွန်တော့ပါဘူး။ အတွေးမလွန်တဲ့အခါ ဘဝက ပိုပြီး ပျော်ရွှင်စရာ ဖြစ်လာပါတယ်။အားလုံး အတွေးလွန်ခြင်းမှ ကင်းဝေးကြပါစေ။