“လူသားတို့၏မှန်ကန်သော ဆက်သွယ်မှုသည် ချစ်ခင်ကျွမ်းဝင်သော မိတ်သဟာယကို တည်ဆောက်ပေးနိုင်ရမည်”- ပုပ်ရဟန်းမင်းကြီး ဖရန်စစ်အရှင်သူမြတ်

“လူသားတို့၏မှန်ကန်သော ဆက်သွယ်မှုသည် ချစ်ခင်ကျွမ်းဝင်သော မိတ်သဟာယကို တည်ဆောက်ပေးနိုင်ရမည်”- ပုပ်ရဟန်းမင်းကြီး ဖရန်စစ်အရှင်သူမြတ်

ဗာတီကန် ပုံနှိပ်တိုက် (Libreria Editrice Vaticana “LEV”) နှင့် လူထုဆက်သွယ် ရေးရုံးတော် (the Dicastery for Communication) က ပုပ်ရဟန်းမင်းကြီး ဖရန်စစ်အရှင်သူမြတ်၏ အထူးမိန့်ဆိုချက်များပါဝင်သော “ကွဲပြားမှုနှင့်စည်းလုံးမူ-ကျွန်ုပ်အပြန်အလှန်ဆက်သွယ်၏။ ထို့ကြောင့်ကျွန်ုပ်တည်ရှိ၏” (Diverse and united: I com-municate, therefore I am” ဟူသော စာတမ်းသစ်တစ်စောင်ကို ပုံနှိပ်ထုပ်ဝေလိုက်သည်။ 

ထိုစာတမ်းထဲတွင် ဘုရားရှင်၏ရွှေပုံသဏ္ဍန်နှင့်အညီဖန်းဆင်းခံထားရသော လူသားတို့အချင်းချင်းကြား တည်ရှိသည့် အပြန်အလှန်ဆက်သွယ်မှုအပေါ် ပုပ်ရဟန်းမင်းကြီးဖရန်စစ်အရှင်သူမြတ်၏ထောက်ရှု မိန့်ဆိုချက်များပါဝင်သည်။ 

၄င်းစာတမ်းသည် ဆုလက်ဆောင်များ အပြန်အလှန်လဲလှယ်ခြင်း (Exchange of gifts) ဟူသည့် ပုပ်ရဟန်းမင်းကြီး ဖရန်စစ်အရှင်သူမြတ်၏ အဆိုအမိန့်များနှင့် မိန့်ခွန်းများ ကို စုစည်းထားသည့် စာတမ်းရှည်ကြီး၏ တစ်စိတ်တစ်ပိုင်းလည်းဖြစ်သည်။ ထိုစာတမ်းရှည်ကြီးသည် ခရစ်ယာန်ဂိုဏ်းဃနများခကို အဓိကရည်ညွှန်းထားလျက် စာတမ်း၏ အခန်းအသီးသီး၌ ကက်သလစ်ခရစ်ယာန်မဟုတ်သော အခြားသော ခရစ်ယာန်ဂိုဏ်းမှ ကိုယ်စားလှယ်ပုဂ္ဂိုလ်တစ်ဦး၏ ဥယျောဇဉ်အမှာစာကိုလည်း ထည့်သွင်းသည်။  

ယခုထုတ်ဝေလိုက်သော စာတမ်းအသစ်တွင် အင်္ဂလီကန်အသင်းတော်၏ ဦးသျောင် (the principle leader of the Anglican Communion)၊ ကန်တာဘူရီ ဂိုဏ်းချုပ်ဆရာတော်ကြီး (the Archbishop of Canterbury) ဖြစ်သည့် ဒေါက်တာဂျပ်စတင်း ဝဲလ်ဘီ (Dr Justin Welby) ၏ အမှာစာကို ထည့်သွင်းထားသည်။ 

ဂိုဏ်းချုပ်ဆရာတော်ကြီး ဒေါက်တာဂျပ်စတင်း ဝဲလ်ဘီက “ခရစ်တော် ၌ညီအစ်ကိုတော်ဖြစ်သည့် ပုပ်ရဟန်းမင်းကြီး ဖရန်စစ်အရှင်သူမြတ်က ဘုရားရှင်၏ မဟာမေတ္တာ၊ဂရုဏာတော်ကို ကျွနု်ပ်တို့အားချပြသွန်သွင်တော်မူခဲ့ ပြီ။ ထိုမဟာမေတ္တာ၊ဂရုဏာတော်သည် ဘုရားရှင်နှင်ကျွန်ုပ်တို့လူသားတို့ကြားဆက်သွယ်မှု တည်ဆောက်ပြီး သူနှင့် မိတ်သဟာယဖွဲ့ရန်ဖိတ်ခေါ်သော ချစ်ခြင်းမေတ္တာမျိုး ဖြစ်ကြောင်း နှင့် ယခုစာတမ်းအသစ်တွင်ပါဝင်သော ရဟန်းမင်းကြီးဖရန်စစ်၏ မိန့်ဆိုချက်များနှင့် ရေးသားချက်များမှ သင်ယူလေ့လာစရာများစွာရှိကြောင်း” ၄င်း၏အမှာစာတွင် ဖော်ပြထားသည်။ 

ခရစ်တော်၏အကြည့်တစ်ချက် (With the gaze of Christ)

ယခုထုတ်ပြန်လိုက်သော စာတမ်းသစ်၌ ခရစ်တော်၏အကြည့်တစ်ချက် (With the gaze of Christ) ဟူသည့် အခန်းသစ်တစ်ခုလည်းပါဝင်သည်။ ထိုအခန်းသစ်တွင် ပုပ်ရဟန်းမင်းကြီး ဖရန်စစ်က ရှင်မာကုခရစ်ဝင်ကျမ်းလာ ခရစ်တော်ဘုရားနှင့် ထာဝရ အသက်ရှာဖွေနေသာ သူကြွယ်လူငယ်တို့ ၏တွေ့ဆုံခန်းကို အထူး ထောက်ရှု တင်ပြထားသည်။ ရှင်မာကုခရစ်ဝင်ကျမ်း၌ ခရစ်တော်နှင့် သူကြွယ်လုလင်ငယ်တို့၏ တွေ့ဆုံခန်းကို  “ယေဇူးသည် သူ့ကိုကြည့်ပြီး ချစ်ခင်စိတ်ဖြစ်ပေါ်သဖြင့်” (မာကု ၁ဝး၂၁)  ဟူ၍ထူးရှားစွာ အသေးစိတ် တင်ပြထားသည်။  

ထိုအချက်သည် ခရစ်တော်ဘုရား၏ စရိုက်လက္ခဏာကို ဖော်ပြနေခြင်းပင်ဖြစ်ကြောင်း၊ ခရစ်တော်သည် လူတစ်ဦးမိမိအားပြောပြနေသော အကြောင်းအရာထက် ထိုလူပုဂ္ဂိုလ်ကို ပို၍အလေးပေးကြောင်း၊ သို့ပါ၍ လူသားတို့အချင်းချင်းကြား စစ်မှန်သောဆက်သွယ်ရေးကို တည်ဆောက်ရာ၌ ကမ္ဘာလောကကြီးနှင့်ချိတ်ဆက်ကာ မှန်ကန်သောလူမှုဆက်ဆံရေးတို့ရှိရန် အထူးလိုအပ်ကြောင်း ပုပ်ရဟန်းမင်းကြီး ဖရန်စစ်မှ အဆိုပါစာတမ်းသစ်တွင် မိန့်တော်မူထားသည်။ 

တစ်ပါးသူအားတန်ဖိုးထားခြင်း “Contemplating the “other”

မေတ္တာပါသောအကြည့်တို့ ကင်းမဲ့နေပါက လူအချင်းချင်းကြားဆက်သွယ်မူသည် လူနှစ်ဦး၏ စကားလက်ဆုံကျသာမာန် တွေ့ဆုံမှုမျှသာဖြစ်သည်။ ကျွန်ုပ်တို့ဘဝများကို တစ်ပါးသူအတွက် ပွင့်လင်းပြူငှာစွာ ဖွင့်ဟထားပါက ကျွန်ုပ်တို့တွက်သာမက တစ်ပါးသူများ အတွက်ပါ ဘဝ၏အဓိပ္ပါယ်ကို လေးနက်စွာ နားလည်သဘောပေါက်လာပါလိမ့်မည်။ သို့မှသာ လူသားတို့ကြားဆက်သွယ်ရေးသည် သတင်းအချက်အလက်များ မျှဝေဖလှယ်ရန်တွက်သာမက ရင်းနှီးကျွမ်းဝင်သောမိတ်သဟာယကို တည်ဆောက်ရာရောက်ပေမည်။ 

ပွင့်လင်းပြူငှာသောစိတ်သဘောထား (A predisposition to openness)

လူသားအချင်းချင်းဆက်သွယ်ရာ၌ စွန့်စားစရာများလည်း ရှိနေတတ်၏။ ဤသို့ဆက်သွယ်ရာတွင် မိမိကိုယ်ကို မိမိသိမြင်နားလည်ခြင်းဖြင့်အစပြုရသော်ငြား တစ်ပါးသူ၏ အခြေအနေကိုလည်း သိမြင်နားလည်နိုင်ရန် ပွင့်လင်းပြူငှာသော စိတ်သ ဘောထားရှိရန်လိုအပ်သည်။ ထိရောက်ပြီးအကျိုးရလဒ်ကောင်းသော တွေ့ဆုံဆွေးနွေး ပေါင်းသင်းဆက်ဆံရေးကိုတည်ဆောက်ရန်အတွက် မိမိ၏ပကတိအခြေအနေကို နားလည်လက်ခံရုံသာမက တစ်ပါးသူ၏ ပကတိအရှိတရားကိုလည်း အသိအမှတ်ပြူကာ သူတို့၏လွတ်လပ်ခွင့်ကိုလေးစား ကြိုဆိုလက်ခံတတ်ရကြရ ပေမည်။ 

ဆက်လက်၍ ပုပ်ရဟန်းမင်းကြီးဖရန်စစ်က ရဟန္တာစိန့်ဂျွန်ဟင်နရီနယူးမင်း (St. John Henry Newman) ၏သွန်သင်ချက်ကို ကိုးကားလျက် လူသားတို့အချင်းချင်း တွေ့ဆုံဆွေးနွေးအဖြေရှာရာ၌  ပြဿနာ၏အမှန်တရားကိုဖေါ်ထုတ်ရန် အရေးပါလိုအပ်လှသော်လည်း ထိုအမှန်တရား တစ်ခုတည်းကိုသာ တရားသေ လက်ကိုင်ပြုထားခြင်းထက် အချင်းချင်း ပွင့်လင်းပြူငှာလက်ခံတတ်သော စိတ်သဘောထားသည်သာ ပို၍အဓိကအရေးပါလှကြောင်း မှတ်ချက်ပြုထားသည်။ 

ထိုထက်တိကျစွာဆိုရသော် တွေ့ဆုံဆွေးနွေးသူတို့၏ စိတ်နေသဘောထားသည် အလွန်ပင်အရေးကြီးလှသောကြောင့် လူအချင်းချင်းဆက်သွယ်မှုသည် ထိုစိတ်နေသဘောထားများအား အတွန်းအတိုက်၊အပွန်းအပဲ့ခံနိုင်ပြီး ပြောင်းလဲတိုးတက်မှုကိုလိုလားသော စိတ်သအဘောထားများအဖြစ်သို့ တွန်းပို့စေနိုင်သော တွေ့ဆုံမှုဖြစ်ရန်လိုကြောင်း၊ ထိုသို့ဖြစ်လာရန် ပွင့်လင်းပြူငှာသော တွေ့ဆုံဆွေးနွေးမှု ဖြစ်ရန်လိုကြောင်း နှင့် ရဲရင့်သောသတ္တိခွန်အား တို့ရှိရန်လိုအပ်ကြောင်း ရဟန်းမင်းကြီးမှ၄င်း၏ စာတမ်းအသစ်တွင်မိန့်ဆိုထားသည်။ 

လွတ်လပ်ခြင်းသည် အဓိက (The Importance of Freedom) 

ဧဝံဂေလိကျမ်းစာတော်မြတ်ထဲ၌ သူကြွယ်လုလင်ငယ်သည် ဥစ္စာပစ္စည်းများစွာ ပိုင်ဆိုင်သူဖြစ်သောကြောင့် ဝမ်းနည်းစွာဖြင့် ခရစ်တော်ဘုရားထံတော်ပါးမှ ထွက်ခွာသွားခဲ့သည်။ စည်းစိမ်ဥစ္စာတိို့၏ကျွန်ပြုခြင်းကိုခံရ၍ လွတ်လပ်ခြင်းမရှိသောကြောင့် ထိုသူကြွယ်လုလင်ငယ် ဝမ်းနည်းစွာ ထွက်သွားခဲ့ခြင်းဖြစ်ကြောင်း ရဟန်းမင်းကြီးဖရန်စစ်က ထောက်ပြသွန်သင်ထားသည်။ 

လွတ်လပ်ခြင်း (Freedom) သည်သာ လူသားတို့အား ဤကမ္ဘာမြေဝယ် ဥဿုံကြွယ်ဝလူပီသစေသည့် ဆေးဖင်ဝင်ဖြစ်သောကြောင့် လူအချင်းချင်း ဆက်သွယ်မှုတိုင်းသည် လူသားဆန်၍လူပီသစေသော အရာများဖြစ်လေသည်။ လွတ်လပ်မှုကင်းမဲ့ပါက အမှန်တရားဆိတ်သုဉ်း၏။ လူသားအချင်းချင်းကြား ပေါင်းသင်း ဆက်သွယ်မှုတို့သည်လည်း စိတ်ကူးယဉ်အိပ်မက်ကဲ့သို့ ဟန်ဆောင်ဖုံးကွယ်မှုများ နှင့်ပြည့်နှက်ကာ အနှစ်သာရကင်းမဲ့နေတတ်၏။ ထို့ထက်ပိုဆိုးသည်ကား လွတ်လပ်ခြင်းမပါသောဆက်သွယ်မှုသည် လူသားတို့မှ မိမိတို့၏အတ္တ ကိုယ်ကျိုးအတွက် လူအချင်းချင်းပေါင်းသင်းဆက်သွယ်ခြင်းအား ကရိယာ တန်ဆာပလာအဖြစ်အလွဲသုံးစားပြုခြင်းသက်သက်သာဖြစ်သည်ဟုမှတ်ယူရပေမည်။ 

ရဟန်းမင်းကြီးက ရှင်မာကုဧဝံဂေလိကျမ်းကို ဆက်လက်ကိုးကား၍ “ခရစ်တော်ဘုရားရှင်၏ မိန့်ကြားချက်က သူကြွယ်လုလင်ငယ်သည် လွပ်လပ်ခြင်းနှင့်ကယ်တင်ခြင်း ရရှိရန်မျှော်လင့်ချက်ရှိနေသေးကြောင်း ဖော်ပြနေပေသည်။ တပည့်တော်ကြီးများက ‘ဤသို့လျင် အဘယ်သူကယ်တင်ခြင်းရရှိနိုင်မည်နည်း’ ဟုမေးလျောက်ကြသောအခါ ‘ဤအမှုအရာသည်လူတို့အတွက်မဖြစ်နိုင်သော်လည်း ဘုရားသခင်အတွက်မူဖြစ်နိုင်တော်မူ၏ (မာကု၁ဝး၂၇)’ဟုပြန်လည်ဖြေကြားတော် မူခဲ့သည်။”

ဤအခြင်းအရာက ဆုတောင်းမေတ္တာပြုရန်ကျွနု်ပ်တို့၏နှလုံးသားများကိုဖွင့်ထားရန်နှင့် ကျွနု်ပ်တို့လူအချင်းချင်းပေါင်းသင်းဆက်ဆံဆက်သွယ်မှုတိုင်းသို့ ဘုရားသခင်ကို ခေါ်ဖိတ်ရန်် ညွှန်ပြနေကြောင်း၊ ခရစ်တော်ဘုရားသည် သူနှင့်စကားစမြည်ပြောဆို နေသူအားလုံးကို မေတ္တာလွှမ်းသောအကြည့်ဖြင့် ကြင်နာစွာ ကြည့်နေကြောင်း ရဟန်းမင်းကြီးကမိန့်ဆိုသည်။ 

စာတမ်းသစ်၏အဆုံး၌ “ဘုရားသခင်သည်မေတ္တာဂရုဏာလွှမ်းခြုံသောအကြည့်ဖြင့် ကျွန်ုပ်တို့အား အစဉ်စောင့်ကြည့်တော်မူပါမည့်အကြောင်း၊ ကျွနု်ပ်တို့သည်လည်း တစ်ပါးသူများနှင့် ပေါင်းသင်းဆက်ဆံဆက်သွယ်မှုပြုသည့်အခါတိုင်း၌ မိမိကိုယ်ကို အဆုံးတိုင်ပေးဆပ်၍ ရက်ရောကြင်နာ၊ကျေးဇူးပြုတတ်သောခရစ်တော်ဘုရားရှင်၏ အကြည့်မျိုးဖြင့် ရှုမြင်နိုင်ကြပါမည့်အကြောင်း” ဆုတောင်းမေတ္တာဖြင့်နိဂုန်း ချုပ်ထားလေသည်။ 

ဘာသာပြန်- Fr Stephen Aung Min

https://bit.ly/3f77igk