ရဟန်းမင်းကြီးဖရန်စစ်၏ (၁၀) နှစ်တာအမှုဆောင်မှတ်တမ်း

ရဟန်းမင်းကြီးဖရန်စစ်၏ (၁၀) နှစ်တာအမှုဆောင်မှတ်တမ်း

(မတ်လ ၁၃) ရက်တနင်္လာနေ့သည် ရဟန်းမင်းကြီးဖရန်စစ်မှ အမိကက်သလစ်သာသနာတော်ကြီး၏အမြင့်ဆုံးအမှုတော်ကိုထမ်းဆောင်ခဲ့သည်မှာ (၁၀) နှစ်တင်းတင်းပြည့်သွားသောသမိုင်း၀င်နေ့တစ်နေ့ဖြစ်ပါသည်။

ရဟန်းမင်းကြီးဖရန်စစ်သည် မကြာမီကပျံလွန်သွားခဲ့သော ရဟန်းမင်းကြီးဘေနေ
ဒစ် (၁၆) ၏အရိုက်အရာကိုဆက်ခံခဲ့သောရဟန်းမင်းကြီး တစ်ပါးဖြစ်ပါသည်။ ရဟန်းမင်းကြီးဖရန်စစ်သည် သာသနာတော်ကြီးကိုဦးစီးဦးရွတ်ပြုရန်အတွက် ယေဇူးသခင်၏အာဏာကုန်လွဲအပ်ခြင်းခံခဲ့ရသော တပည့်တော်ကြီး (၁၂) ပါးအနက် တစ်ပါးဖြစ်သော ပထမဦးဆုံးရဟန်း မင်းကြီးပေတရု၏အရိုက်အရာကိုဆက်ခံသူ (၁၆၅) ပါး မြောက်ဖြစ်ပါသည်။

ရဟန်းမင်းကြီးဖရန်စစ်၏ (၁၀) နှစ်တာအတွင်းထမ်းဆောင်ခဲ့သောပဓာနကျလှသောလုပ်ဆောင်ချက်များကိုခုနှစ်အလိုက်တင်ပြလိုက်ပါသည်။

(၂၀၁၃) မတ်လ (၁၃)

ရဟန်းမင်းကြီးဘေနေဒစ် (၁၆) အမှုတော်မှအနားယူပြီး နှစ်ပတ်အကြာတွင်ကာဒီနယ် Jorge Bergoglio တစ်ဖြစ်လဲရဟန်း မင်းကြီးဖရန်စစ်ဖြစ်လာခဲ့သည်။ ရဟန်း မင်းကြီးအဖြစ်ရွေးချယ်ခံရသောအခါ ယခင်အမည်မှ 'အာစီးစီမြို့မှစိန့်ဖရန်စစ်' ၏အမည်ကိုပြောင်းလဲခံယူခဲ့သည်။ ဤအမည်သည် အမိကက်သလစ်သာသနာတော်ကြီး၏ ရဟန်းမင်းကြီးတို့၏စာရင်းတစ်လျှောက်၌ ယခုတစ်ကြိမ်သည် ပထမဦးဆုံးရွေးချယ်ခံယူသောအမည်ဖြစ်လာခဲ့သည်။ ဤအမည်ကိုရွေးချယ်ခဲ့ခြင်းမှာ စိန့်ဖရန်စစ်အားဂုဏ်ပြုရန်ဖြစ်ကြောင်းစိန့်ပီတာဘုရားကျောင်း၏အပေါ်ထပ်၌ပြုလုပ်ထားသောစကားပြောစင်မှမိန့်ကြားခဲ့သည်။

'ဆရာတော်တို့၊ ဘာသာတူအပေါင်းတို့ ဤရောမသာသနာ၏ခရီးကို ကျွန်ုပ်တို့အစပြုလျှောက်ကြပါစို့။ ရောမသာသနာသည် ကမ္ဘာပေါ်ရှိသာသနာများအားလုံးအပေါ် မေတ္တာများ‌ေ၀မျှပေးရသောခရီး၊ ညီအစ် ကိုရင်းစိတ်ဓာတ်ဖြင့်အတူတကွလျှောက်လှမ်းရမည့်ချစ်ခြင်းခရီး၊ အချင်းချင်းလေးစားယုံကြည်သောခရီးကိုလျှောက်လှမ်းရမည်ဖြစ်သည်။ ကျွန်ုပ်တို့အားလုံးအချင်းချင်းအတွက် အစဉ်ဆုတောင်းပေးကြပါစို့။' ဟုဆိုခဲ့သည်။

(မတ်လ ၁၄)

ရဟန်းမင်းကြီးဖရန်စစ်သည် သူ၏အမှုတော်စတင်ထမ်းဆောင်သည်နှင့်သူတည်းခိုခဲ့သောအဖိုးအခကိုသူကိုယ်တိုင်ပေးချေခဲ့သည်။ သူ၏ပစ္စည်းများကိုလည်းကိုယ်တိုင်သိမ်းဆည်းခဲ့သည်။

(ဇူလိုင် ၈) ရက်နေ့၌ရဟန်းမင်းကြီးသည် အီတလီနိုင်ငံ၏ကျွန်းမြို့တစ်မြို့ဖြစ်သော Lampedusa သို့သွားရောက်ပြီး ရွေ့ပြောင်းအလုပ်သမား (၅၀) ဦးနှင့်တွေ့ဆုံခဲ့သည်။ ဒုက္ခသည်အများပိုင်းမှာ လူငယ်များဖြစ်ကြပြီး ဆိုမာလီးယားနှင့် Eritrea နိုင်ငံတို့မှဖြစ်ကြသည်။ ထိုကျွန်းမြို့သည်တူနီးစီးယားကမ်းခြေနှင့် မိုင် (၂၀၀) ‌ေ၀းသည်။ ဤရေကြောင်းသည် အာဖရိကမှသော်လည်းကောင်း၊ အရှေ့အလယ်ပိုင်းမှသော်လည်းကောင်း ဥရောပသို့၀င်ရောက်ရန်အတွက်၀င်ပေါက်ကြီးတစ်ခုဖြစ်နေသည်။

ရဟန်းမင်းကြီးဖရန်စစ်သည် ရဟန်းမင်း ကြီးအမှုတော်ကိုခံယူပြီးနောက် ရောမမြို့ပြင်ဖြစ်သော ဤကျွန်းမြို့သို့ပထမဦးဆုံးကြွရောက်လည်ပတ်ခဲ့သောနေရာဖြစ် သည်။ ဤသို့ကြွရောက်ခြင်းဖြင့် လူသူအရောက်အပေါက်နည်းသောနေရာများဆီသို့ကြွရောက်ခြင်းကိုစတင်ဦးတည်လုပ် ဆောင်ခဲ့ခြင်းဖြစ်သည်။

(ဇူလိုင် ၂၃-၂၈) အထိရဟန်းမင်းကြီးဖရန်စစ်သည် ဘရာဇီးလ်နိုင်ငံ၏မြို့တော် Rio de Janeiro သို့ ကမ္ဘာ့လူငယ်များနေ့အတွက်ကြွရောက်သွားခဲ့သည်။ ထိုအခမ်းအနားသို့ ကမ္ဘာတစ်၀ှမ်းမှလူပေါင်း (၃) သန်းကျော်တက်ရောက်ခဲ့သည်။

(ဇူလိုင် ၂၉) ရက်နေ့ ဘရာဇီးမှကမ္ဘာ့လူငယ်များနေ့အခမ်းအနားမှအပြန် လေယာဉ်ပေါ်၌သတင်းစာရှင်းလင်းပွဲကိုကျင်းပခဲ့သည်။ ထိုသတင်းစာရှင်းလင်းပွဲ၌လွိင်တူအရေးနှင့်စပ်လျင်း၍ 'အချို့သောသူတို့သည် လွိင်တူဖြစ်နေသော်လည်း ဘုရား သခင်ကိုရှာဖွေကြသည်။ စိတ်ကောင်းနှလုံးကောင်းရှိကြသည်။ ဤသို့သော်လူမျိုးကိုကျွန်ုပ်အနေဖြင့်မည်သို့သောလူစားဖြစ်၍စီရင်ရမည်နည်း' ဟုဖြေကြားခဲ့သည်။ ဤသို့ဖြေကြားခဲ့သည်ကို သတင်းသမားများကလိုရာလုပ်ကြံဆွဲပြောခဲ့၍ဟိုးလေးတကြော်ကြော်ဖြစ်ခဲ့သေးသည်။

(နို၀င်ဘာလ ၂၄) ရက်၌ ရဟန်းမင်းကြီးဖရန်စစ်သည် သူ၏ပထမဦးဆုံးစာချွန်တော်ဖြစ်သော 'Evangelii gaudium' (The Joy of the Gospel ဧ၀ံဂေလိတရား၏၀မ်းမြောက်ဖွယ်) ကိုပုံနှိပ်ထုတ်‌ေ၀ခဲ့သည်။ ဤစာချွန်တော်၌ ရဟန်းမင်းကြီးဖရန်စစ်အနေဖြင့် သူ၏ဦးဆောင်မှုကာလအတွင်း မျက်မှောက်ကမ္ဘာကြီးအားဧ၀ံဂေလိတရား ဟောကြားရာတွင်အဘယ်နည်းလမ်းဖြင့်ချဉ်းကပ်မည်ကိုမြင်တွေ့နိုင်သည်။

(၂၀၁၄) (ဖေဖော် ၂၂) ရက်နေ့၌ ရဟန်းမင်းကြီးဖရန်စစ်သည် ကာဒီနယ်အသစ် (၁၉) ကိုးပါးကိုရွေးချယ်တင်မြောက်ခဲ့သည်။ ကာဒီနယ်အသစ်များစာရင်း၌ ယခင်ကနှင့်မတူဘဲ ဖွဲ့ဖြိုးဆဲနိုင်ငံ ဥပမာအားဖြင့် 'ဟေတီ' နိုင်ငံနှင့်ကက်သလစ်ဘာသာတူဦးရေးနည်းသောနိုင်ငံများမှလည်းပါလာခဲ့သည်။

(မတ် ၂၂) ရက်နေ့၌ ရဟန်းမင်းကြီးဖရန်စစ်သည် သက်ငယ်များအားကာကွယ်သောကော်မရှင်တစ်ခုကိုဖွဲ့စည်းလိုက်သည်။ ထိုကော်မရှင်၏အဓိကတာ၀န်ကား သက်ငယ်များနှင့်မိမိတို့ကိုယ်ကိုမကာကွယ်နိုင်သောအခြေအနေရှိသူများ၏ ဂုဏ်သိက္ခာကိုကာကွယ်ပေးရန်၊ အထူးသဖြင့်လွိင်အကြမ်းဖက်မှုများ၊ မတရားပြုကျင့်မှုများမှကာကွယ်ပေးရန်ဖြစ်သည်။

(အောက်တိုဘာ ၅) ရက်နေ့၌မူ မိသားစု 'ဆီးနော့' ကြီးကိုစတင်ကျင်းပခဲ့သည်။ ဤဆီးနော့၌ ဆရာတော်များက မိဘမစုံတော့သည့်အိမ်ထောင်သည်များအတွက်အိမ်များအကြောင်း၊ လက်ထပ်ထိမ်းမြှားခြင်းစက္ကရာမင်တူးမခံယူဘဲ အတူပေါင်းသင်းနေထိုင်သည့်ကိစ္စ၊ လွိင်တူစုံတွဲများမှသားသမီးမွေးစားသည့်အကြောင်းအရာ၊ ဘာသာမခြားလက်ထပ်ထိမ်းမြှားခြင်းဆိုင်ရာအကြောင်းအရာများကိုအကျယ်တစ်၀င့်ဆွေးနွေးခဲ့ကြသည်။

(ဒီဇင်ဘာ ၆) ရက်နေ့၌ ရောမရှိရဟန်းမင်း ကြီး၏အုပ်ချုပ်ရေးဆိုင်ရာရုံးတော်ကိုပြုပြင်ရန်အစီအစဉ်ကို အာဂျင်တီးနားသတင်းစာတစ်စောင်ဖြစ်သော La Nacion ၏တွေ့ဆုံမေးမြန်းချက်ကိုလက်ခံဖြေ ကြားခဲ့သည်။ 'တင်းခံနေခြင်းသည် သက်သေကောင်းတစ်ခုမဟုတ်ပေ။ ကျွန်ုပ်အတွက်ထို တင်းရင်းခံနေခြင်းကိုဖွင့်ချခြင်းမှာကောင်းသောလက္ခဏာဖြစ်သည်။ သဘောတူညီချက်မရသောအခါ ကိုယ်ပျောက်ကဲ့သို့လုပ်ဆောင်ရမည်မဟုတ်။ ပွင့်လင်းမြင်သာမှုရှိအောင်လုပ်ဆောင်ခြင်းသည်လွန် စွာကောင်းပါသည်။

(၂၀၁၅) ခုနှစ် (ဇန္န၀ါရီ ၁၈) ရက်နေ့၌ ရဟန်းမင်းကြီးသည်ဖိလစ်ပိုင်နိုင်ငံသို့ကြွရောက်နေပြီး ထိုခရီးစဉ်၏အဆုံးသတ်နေ့အဖြစ် မနီလာ၌မစ္ဆားပူဇော်ရန်ဖြစ်သည်။ ထိုနေ့၌မိုးသည်းကြီးမဲကြီးရွာနေသော် လည်း ရဟန်းမင်းကြီး၏မစ္ဆားပူဇော်ခြင်း၌ ဘာသာတူပေါင်း (၆ - ၇) သန်းခန့်ပါ၀င်ပူဇော်ခဲ့သည်။

(မတ်လ ၂၃) ရက်နေ့၌ ရဟန်းမင်းကြီးဖရန်စစ်သည် အီတလီနိုင်ငံ၊ နေပယ်မြို့သို့ကြွရောက်ခဲ့သည်။ အဘယ်ကြောင့်ဆိုသော် ထိုပြည်နယ်၌လွန်စွာသတင်းကြီးနေသောအကျင့်ပျက်ခြစားမှုနှင့်မြို့အတွင်း ၌ရာဇ၀တ်မှုကို အစီအစဉ်တစ်ကျကျူး လွန်သောရာဇ၀တ်မှုနှင့်ကိုသာသနာတော်ကြီးအနေဖြင့်မသိသကဲ့သို့ရေငုံနှုတ်ပိတ်မနေနိုင်ဘဲ ပါ၀င်ကူညီတိုက်ခိုက်ဖော်ထုတ်ဆန့်ကျင်ကြောင်းပြသရန်ဖြစ်သည်။

(မေ ၂၄) ရက်နေ့၌ ရဟန်းမင်းကြီးဖရန်စစ်သည် သဘာ၀ပတ်၀န်းကျင်ထိန်းသိမ်းရေးနှင့်ကမ္ဘာကြီးပူနွေးလာမှု၌ သာသနာတော်ကြီးအနေဖြင့်ပါ၀င်တွန်းလန်ဟန့်တားအသိပေးရမည့်တာ၀န်ရှိသည်ကိုသိရှိသဘောပေါက်လာစေရန် 'Laudato si' စာချွန်တော်ကိုထပ်မံပုံနှိပ်ထုတ်‌ေ၀ခဲ့ပါသည်။ ဤစာချွန်တော်အားဖြင့် လူတိုင်းသဘာ၀ပတ်၀န်းကျင်ကိုဂရုစိုက်စောင့် ရှောက်တတ်ရန်နှင့်ရာသီဥတုပူနွေးလာမှုကိုနိုင်ငံ့အရေးအဖြစ်အဆိုတင်သွင်းရန်တိုက်တွန်းလိုက်ခြင်းလည်းဖြစ်သည်။

(စက်တင်ဘာ ၁၉-၂၂) ရက်နေ့၌ ရဟန်းမင်းကြီးဖရန်စစ် ကျူးဘားနိုင်ငံသို့ကြွရောက်ခဲ့ပြီး ထိုနိုင်ငံ၏ခေါင်း‌ဆောင် Fidel Castro နှင့်တွေ့ဆုံခဲ့သည်။ (၁၉၉၈) စိန့်ဂျွန်ပေါလ် (၂) ကြွရောက်ပြီးနောက်ပိုင်း နှစ်ပေါင်းများစွာကြားပြီးနောက် ယခုကြွရောက်ခြင်းသည်ပထမဦးဆုံးဖြစ်သည်။ ရဟန်းမင်းကြီးဖရန်စစ်သည် မစ္ဆားတရားအတွင်းဩ၀ါဒ၌ လူ့ဂုဏ်သိက္ခာအကြောင်း၊ ခရစ်ယာန်တစ်ဦးဖြစ်ရခြင်းသည် ကျွန်ုပ်တို့ညီအစ်ကိုမောင်နှမများ၏လူ့ဂုဏ်သိက္ခာကိုမြင့်တင်ပေးရမည်။ တိုက်ယူပေးရမည်။ ဤအတွက်အသက်ရှင်သန်ရမည်ဖြစ်သည်' ဟုမိန့်ကြားခဲ့သည်။

(စက်တင်ဘာလ ၂၂-၂၇) ရက်နေ့များ၌လည်းရဟန်းမင်းကြီးဖရန်စစ်သည် ကျူးဘားနိုင်ငံမှပင်အမေရိကန်ပြည် ထောင်စုသို့ကြွရောက်ခဲ့သည်။ မြို့တော်၀ါရှင်တန်ဒီစီရှိ ကွန်ကရက်စ်၌ဩ၀ါဒချီးမြှင့်ခဲ့ရာ မပူမအေးတအုံအုံတနွေးနွေးဖြစ်နေသူများအား လူသားကောင်းကျိုးအတွက်ရှေ့ဆက်အားထုတ်လုပ်ဆောင်ရန်တိုက်တွန်းခဲ့သည်။ ထို့အတူ အမေရိကန်ပြည်ထောင်စုသို့သာသနာပြုခဲ့သောဖရန် စ္စကင်အသင်း၀င်စိန့် Junípero Serra အားရဟန္တာတင်မြောက်ခဲ့သည်။ တစ်ဆက် တည်း၌ပင် အမေရိကန်ပြည်ထောင်စုဖီလာဒဲဖီးယား၌ကျင်းပနေသော ကမ္ဘာ့မိသားစုဆီးနော့သို့လည်းတက်ရောက်၍မိသားစုဆိုင်ရာလက်ဆောင်နှင့်တန်ဖိုးအကြောင်းကိုမိန့်ကြားခဲ့သည်။

(အောက်တိုဘာ ၄) ရက်နေ့၌ ရဟန်းမင်းကြီးဖရန်စစ်သည် မိသားစုဆိုင်ရာဆီးနော့ကိုဒုတိယအကြိမ်ကျင်းပပြီး ထိုဆီးနော့၌မျက်မှောက်ခေတ်မိသားစုများတွေ့ကြုံနေရသောအကြောင်းအရာများကိုတင်ပြဆွေးနွေးခဲ့ကြသည်။ အထက်ကဆိုခဲ့သည့်အတိုင်း မိသားစုကိုမိဘတစ်ဦးတည်း (ဖခင် (သို့) မိခင်) ကသာစောင့်ရှောက်နေရသောမိသားစုများ၊ လက်ထပ်ထိမ်းမြှားခြင်းမပြုဘဲပေါင်း သင်းနေထိုင်နေသူများအရေး၊ ဆင်းရဲ နွမ်းပါးမှုနှင့်မိသားစုအတွင်းအပြင်အကြမ်းဖက်သည့်အရေးများများပါ ၀င်သည်။

(အောက်တိုဘာ ၁၈) ရက်နေ့၌ စိန့်လွီစ်မာတင်းနှင့်စိန့် Marie-Azélie တို့အားရဟန္တာတင် မြောက်ပေးခဲ့သည်။ ဤအိမ်ထောင်ရှင်စုံတွဲသည် Lisieux မြို့မှစိန့်ထရေဇား (သူငယ်တော်ယေဇူး၏ သူငယ်တော်မထရေးဇာ) ၏မိဘနှစ်ပါးဖြစ်ပြီး၊ မိသားစုအတွင်းမှ သီလရှင်ငါးပါးဖြစ်လာခဲ့သည်။ ဤအိမ်ထောင်ရှင်စုံတွဲသည် အမိကက်သ လစ်သာသတော်ကြီး၏သမိုင်းတစ် လျှောက်၌ အတူတကွ ရဟန္တာတင်မြောက်ခံရသော ပထမဦးဆုံးစုံတွဲဖြစ်သည်။

(ဒီဇင်ဘာ ၈) ရက်နေ့၌ ရဟန်းမင်းကြီးဖရန်စစ်သည် 'Jubilee Year of Mercy' (သနားခြင်း၏ဂျူဗလီနှစ်) ကိုကြေညာ၍စတင်ခဲ့သည်။ ထိုနှစ်၌ ဘုရားသခင်၏ကရုဏာသနားခြင်းကိုမျက်မှောက်ပြုထောက်ရှု၍ ဘုရားသခင် ၏ခွင့်လွှတ်ခြင်းကိုခံယူကာ လူသားများအပြစ်နွံမှရုန်းထွက်၍ကယ်တင်ခြင်းကောင်းချီးခံစားရရန်ဖြစ်သည်။ ထိုနှစ်၏ထူးခြားသောအခွင့်အရေးမှာ ကမ္ဘာပေါ်ရှိကက်သလစ်သာသနာမှဘုန်းတော်ကြီးများအား ဦးရေအကန့်အသတ်ဖြင့်ဖိတ်ကြား၍လိုအပ်သောသင်တန်းဖို့ချချက်များကိုပေးပြီး 'Missionaries of Mercy' (သနားခြင်း၏သာသနာပြုများ) ဟုအမည်တပ်ကာ ဆရာတော်များ၊ ရဟန်းမင်းကြီးမှသာခွင့်လွှတ်ပိုင်ခွင့်ရှိသောအပြစ်များကိုခွင့်လွှတ်ခွင့်ပေး အပ်ခဲ့သည်။ ဤသို့ပြုလုပ်ရခြင်းမှာ ရဟန်းမင်းကြီးသည် ကမ္ဘာသာသနာအသီးသီးသို့အရောက်မသွားနိုင်သောကြောင့်ကိုယ်စားလှယ်စေလွှတ်ခြင်းဖြစ်သည်။

(2016) (မတ်လ ၁၉) ရက်နေ့၌လည်း ရဟန်းမင်းကြီးဖရန်စစ်သည် 'Amoris laetitia' (ချစ်ခြင်း၏ပျော်ရွှင်ဖွယ်ရာ) ဟုအမည်ပေးထားသော စာချွန်တော်တစ်စောင်ကိုထပ်မံပုံနှိပ်ထုတ်‌ေ၀ခဲ့သည်။ ဤစာချွန်တော်၌ မျက်မှောက်ခေတ်၌ကမ္ဘာပေါ်ရှိမိသားစုများတွေ့ကြုံရင်ဆိုင်နေရသောအသွင်အမျိုးမျိုးဆောင်သည့်အကြောင်းအရာများကိုကမ္ဘာ့မိသားစုဆိုင်ရာဆီးနော့မှအကြောင်းအရာပေါ်အခြေခံ၍ဆွေးနွေးတင်ပြထားသည်။ ဤစာချွန်တော်၏အခန်း (၈) ၌ ရဟန်း မင်းကြီး၏မှတ်ချက်သည် အမိသာသနာတော်ကြီးမှထုံးတမ်းစဉ်လာလက်ဆင့်ကမ်းသင်ကြားလာခဲ့သောကိုယ်တော်မြတ်ပင့်ယူခြင်းနှင့်လက်ထပ်ထိမ်းမြှားခြင်းစက္ကရာမင်တူးဆိုင်ရာသွန်သင်ချက်နှင့်ကွဲလွဲနေဟန်ဖြစ်နေ၍အငြင်းပွားဖွယ်ဖြစ်ခဲ့ရသည်။ အဘယ်ကြောင့်ဆိုသော် မည်သည့်အခြေအနေမျိုး၌ကိုယ်တော်မြတ်စက္ကရာမင်တူးကိုအိမ်ထောင်ကွဲများမပင့်ယူနိုင်၊ ပင့်ယူနိုင်သည့်အကြောင်းနှင့်ပြန်လည်လက်ထပ်ပေါင်းသင်းထားသောမည်သည့်အခြေအနေမျိုးရှိကက်သလစ်ဘာသာတူများကိုယ်တော်မြတ်ပင့်နိုင်၊ မပင့်နိုင်သည့်ကိစ္စများကိုမိန့်ကြားရာ၌နားလည်မှုကွဲလွှဲမှုရှိခဲ့သောကြောင့်ဖြစ်ပါသည်။

(ဧပြီ ၁၆) ရက်၌ ရဟန်းမင်းကြီးဖရန်စစ်သည် 'Lesbos' ဟုခေါ်သောဂရိကျွန်းသို့ကြွရောက်ခဲ့ပြီးနောက် ရဟန်းမင်းကြီးသည် ထိုကျွန်း၌ခိုကိုးနေသောမွတ်စလင်မိသာစု (၃) စုအား သူ၏လေယာဉ်ဖြင့်တစ်ပါတည်းရောမသို့ပြန်လည်တင်ဆောင်လာပေးခဲ့သည်။ ယခုကဲ့သို့ဤဒုက္ခသည်မိသားစုများအားရောမသို့‌ခေါ်ဆောင်လာခြင်းသည် နိုင်ငံတော်ဥပဒေကိုကျော်လွန်၍တရား၀င်လုပ်ဆောင်ခြင်းမျိုးမဟုတ်ကြောင်းကိုလည်းရှင်းပြခဲ့သည်။

(ဇူလိုင် ၂၆-၃၁) နေ့များ၌ ရဟန်းမင်းကြီးသည် ပိုလန်နိုင်ငံ၏မြို့တစ်မြို့ဖြစ်သော 'Krakow' သို့ကြွရောက်ခဲ့သည်။ အဘယ်ကြောင့်ဆိုသော် ထိုနှစ်၌ ကမ္ဘာ့လူငယ်များနေ့ကိုပိုလန်နိုင်ငံတွင်ကျင်းပခဲ့ပြီး ကမ္ဘာတစ်၀ှမ်းမှကက်သလစ်လူငယ် (၃) သန်းခန့်ပါ၀င်ခဲ့ကြသည်။

စက်တင်ဘာ (၄) ရက်၌ အိန္ဒိယနိုင်ငံ၊ Calcutta မြို့မှ 'မာသာရ်ထရေးဇာ' အား ရဟန္တာအဖြစ်တင်မြောက်ခဲ့သည်။ မာသာရ်ထရေးဇာသည် ကက်သလစ်သီလရှင်တစ်ပါးဖြစ်ပြီး အဲလ်ဘေးနီးယားနိုင်ငံသားဖြစ်သည်။ သို့သော်သူသည်ကရုဏာရေးလုပ်ငန်းများကိုအိန္ဒိယနိုင်ငံ၌ဇောက်ချလုပ်ခဲ့ပြီး ထိုအလုပ်ကိုပင်သက်ဆုံးတိုင်ဆက်ကပ်လုပ်ဆောင်ခဲ့သည်။

စက်တင်ဘာ (၃၀) မှ အောက်တိုဘာ (၂) ရက်အထိ Georgia နှင့် Azerbaijan သို့ကြွရောက်သွားခဲ့သည်။ ဤခရီးစဉ်သည် ရဟန်းမင်းကြီးအဖြစ်အမှုတော်ထမ်းဆောင်ပြီးနောက် (၁၆) ကြိမ်မြောက်ရောမမြို့ပြင်ခရီးစဉ်ဖြစ်ခဲ့သည်။ ဤခရီးစဉ်၌ အဓိကထားသောအဓိကထားသောအကြောင်းအရာကား ကက်သလစ်ဘာသာ၀င်များဖြစ်၏ဩသိုဒေါ့စ်နှင့်မွတ်စလင်တို့ကြားဆက်ဆံရေးပြေလည်ရေးဖြစ်သည်။

အောက်တိုဘာ (၄) ရက်၌ ကြိုတင်စီစဉ်ထားခြင်းလည်းမရှိဘဲ အီတလီနိုင်ငံအလယ်ပိုင်း Amatrice သို့ကြွရောက်သွားပြီး ငလျင်ကြောင့်အသက်ဆုံးရှုံးခဲ့သောသူတို့၏၀ိညာဉ်များအတွက်ဆုတောင်းပေးခဲ့သည်။ အဆိုပါငလျင်ကြောင့် လူ (၃၀၀) ခန့်အသက်ဆုံးရှုံးခဲ့ရသည်။

\
(၂၀၁၇) မေလ (၁၂-၁၃) ရက်၌ ရဟန်းမင်းကြီးသည် ပေါ်တူဂီနိုင်ငံ၊ ဖာတီမာမယ်တော်အားဖူးရန်ကြွရောက်ခဲ့ပြန်သည်။ အဘယ်ကြောင့်ဆိုသော် ထိုနှစ်၏မေလ (၁၃) ရက်နေ့သည် အမိမယ်တော်ဖာတီမာ၌ သိုးကျောင်းသားမောင်နှမသုံးဦးထံကိုယ်ထင်ရှားပြခြင်း နှစ် (၁၀၀) ပြည့်နှစ်ပတ်လည်ဖြစ်သည်။

ဇူလိုင် (၁၁) ရက်၌ ကက်သလစ်ဘာသာတူများပင်လျှင် ရဟန္တာအဖြစ်တင်မြောက်ရန်ထည်သွင်းစဉ်းစားသင့်သောသတ်မှတ်ချက်များကိုဖြည့်စွပ်ထည့်သွင်းကြေညာခဲ့သည်။ ထိုသတ်မျတ်ချက်မှာ တရားတော်အတွက်၊ ယုံကြည်ခြင်းအတွက်အသက်ပေးဆက်ခြင်းနှင့်ကွာဟသည်။ ယခုဖြည့်စွက် သောအချက်ကား အသက်ငယ်ငယ်ရွယ်ရွယ်ဖြင့်မိမိတို့၏ဘ၀ကိုဘုရားအားလည်းကောင်း၊ မိမိတို့၏နီးစပ်သူများအတွက်လည်းကောင်းကပ်ကြသောကလေး၊ လူငယ်များလည်းရဟန္တာအဖြစ်တင်မြောက်နိုင်ရန်ထည့်သွင်းစဉ်းစားရန်ဖြစ်သည်။

နို၀င်ဘာ (၁၉) ရက်သည် ပထမဦးဆုံးသော 'ကမ္ဘာ့ဆင်းရဲ့နွမ်းပါးသူများနေ့' အဖြစ်သတ်မှတ်ကျင်းပသောနေ့လည်းဖြစ်သည်။ ထိုနေ့၌ ရဟန်းမင်းကြီးဖရန်စစ်သည် ရောမအတွင်းရှိနွမ်းပါးချို့တဲ့သူသူဦးရေ (၄၀၀၀) နှင့်အတူနေ့လယ်စာဆွမ်းဘုန်းခဲ့သည်။

နို၀င်ဘာ (၂၇) မှ ဒီဇင်ဘာ (၂) ရက်နေ့အထိ အာရှာနိုင်ငံတစ်ခုဖြစ်သော အမိမြန်မာနိုင်ငံတော်သို့ သမိုင်း၀င်တမန်တော်ခရီးကြွရောက်ခဲ့သည်။ အမိမြန်မာနိုင်ငံသို့ကက်သလစ်သာသနာတော်ကြီးရောက်ရှိလာခဲ့သည်မှာနှစ် (၅၀၀) ကျော်ပြီဖြစ်သော်လည်း ရဟန်းမင်းကြီးဖရန်စစ်မတိုင်မှီအချိန် ထိမြန်မာနိုင်ငံသို့ရောက်လာသောသာသနာ၏အမြင့်ဆုံးအမှုတော်ကိုထမ်းဆောင်နေသူမှာ ကာဒီနယ်ပင်ဖြစ်သည်။ ရဟန်းမင်းကြီးဖရန်စစ်သည် အမိမြန်မာနိုင်ငံသို့ကြွရောက်ပြီးနောက်မြန်မာနိုင်ငံ၏အိမ်နီးချင်းဖြစ်သောဘဂ်လာဒေ့ရှ်နိုင်ငံသို့လည်းကြွရောက်သွားခဲ့သည်။ ရဟန်းမင်းကြီးသည် နိုင်ငံတော်အစိုးရ၊ ကက်သလစ်ဘာသာရေးခေါင်းဆောင်များ၊ ဗုဒ္ဓဘာသာဘုန်းကြီးများနှင့်တွေ့ဆုံခဲ့ပြီး ဒေသအတွင်းငြိမ်းချမ်းရေးကိုတိုးမြှင့်လုပ်ဆောင်ရန်မိန့်ကြားခဲ့သည်။

(၂၀၁၈)ဇန္န၀ါရီ (၁၅-၂၁) အထိ ရဟန်းမင်းကြီးဖရန်စစ်သည် လာတင်းအမေရိကားသို့နောက်တစ်ကြိမ်တမန်တော်ခရီးဆန့်ခဲ့ပြန်သည်။ လာတင်းအမေရိကားဒေသတူသော်လည်း ယခုတစ်ကြိမ်၌မူ ချီလီနှင့်ပီရူးနိုင်ငံများသို့ကြွရောက်ခဲ့သည်။ နိုင်ငံ၏အစိုးရအဖွဲ့အစည်း၊ ကက်သလစ်သာသနာ၏ဘာသာရေးခေါင်းဆောင်များနှင့်လည်းတွေ့ဆုံပြီး ကက်သလစ်ဘာသာတူများအား မိမိတို့၏ဘာသာရေးခေါင်းဆောင်များနှင့်နီးကပ်စွာနေကြရန်နှင့်ရုပ်၀တ္ထု၏လွှမ်းမိုးမှုကိုသတိနှင့်ရှောင်ရန်မိန့်ကြားခဲ့သည်။ ချီလီ၌မူ ကက်သလစ်ဘာသာရေးခေါင်းဆောင်တို့၏လွိင်ပိုင်းဆိုင်ရာကျူးလွန်မှုများနှင့်အထင်အမြင်လွှဲမှားစရာအငြင်းပွားဖွယ်ရာများရှိခဲ့သည်။

ဩဂုတ် (၂) ရက်၌ ဗာတီကန်သည် ကက်သလစ်သာသနာတော်ကြီး၏ဘုရားစကားစာအုပ်မှ နံပါတ် (၂၂၆၇) ကိုပြန်လည်ပြုပြင်ဖြည့်စွက်ခဲ့သည်။ ထိုနံပါတ်ကား 'သေဒဏ်အပြစ်ပေးခြင်း' နှင့်ဆိုင်သည်။ ယခင်သွန်သင်ချက်၌ 'သေဒဏ်' သည် အခြေအနေအချို့၌ခွင့်ပြုနိုင်သည်ဟုဖွင့်ဆိုသွန်သင်ခဲ့သည်။ သို့သော် ယခုပြင်ဆင်မွမ်းမံလိုက်သည့်သွန်သင်ချက်၌မူ နိုင်ငံအနေဖြင့် 'သေဒဏ်' ကိုမည်သည့်အခြေအနေ၌မျှမချမှတ်နိုင်ဟုဖြစ်သည်။

ဩဂုတ် (၂၅) ရက်၌ ယခင်အမေရိကန်ပြည်ထောင်စုအတွက် ရဟန်းမင်းကြီး၏ကိုယ်စားလှယ်ဖြစ်ခဲ့သော ဂိုဏ်းချုပ်ဆရာတော် Carlo Viganò က စာမျက်နှာ (၁၁) မျက်နှာပါသောစာအုပ်တစ်အုပ်ကိုထုတ်‌ေ၀ခဲ့သည်။ ထိုစာအုပ်၌ အဆိုပါဂိုဏ်းချုပ်ဆရာတော်သည် ရဟန်းမင်းကြီးဖရန်စစ်အား လက်ရှိထမ်းဆောင်နေသောအမှုတော်မှအနားယူရန်တောင်းဆိုခဲ့သည်။ ဤသို့တောင်းဆိုရခြင်းမှာ ရဟန်းမင်းကြီးဖရန်စစ်အပါအ၀င်ကက်သလစ်ဘုန်းတော်ကြီးများ၏လွိင်မှုကိစ္စအရှုပ်တော်ပုံကိုကိုင်တွယ်သောသူများ ကာဒီနယ် Theodore McCarrick အပါအ၀င်ဤအမှုများကိုဖုံးကွယ်ရန်လုပ်ဆောင်နေသည်ဟုစွပ်စွဲခဲ့သည်။ ရဟန်းမင်းကြီးဖရန်စစ်သည် အစပိုင်း၌တိုက်ရိုက်တုန့်ပြန်ခဲ့ခြင်းမပြုခဲ့ပေ။ အဆိုပါစာအုပ်ပုံနှိပ်ထုတ်‌ေ၀ပြီး (၉) လအကြာ၌ ကာဒီနယ် Theodore McCarrick နှင့်ပတ်သက်၍သူသည်မည်သည့်အကြောင်းအရာမျှကြိုတင်သိရှိခဲ့ရမှုမရှိကြောင်းကိုငြင်းဆိုခဲ့သည်။

ဩဂုတ် (၂၅-၂၆) တွင် ရဟန်းမင်းကြီးဖရန်စစ် အိုင်ယာလန်နိုင်ငံ၊ Dublin မြို့သို့ကြွရောက်သွားခဲ့သည်။ ထိုနေရာ၌လည်း မိသားစုနှင့်ဆိုင်သောအစည်းအ‌ေ၀းကြီးသို့တက်ရောက်ရန်ဖြစ်သည်။ ထိုအစည်းအ‌ေ၀း၏ဆောင်ပုဒ်မှာ 'the Gospel of family, joy for the world' (မိသားစု၏သတင်းကောင်းသည် ကမ္ဘာကြီးအတွက်ပျော်ရွှင်ဖွယ်ဖြစ်သည်' ဟုဖြစ်သည်။

အောက်တိုဘာ (၃-၂၈) အထိ၌ လူငယ်များ၊ ယုံကြည်ခြင်းနှင့်ခေါ်တော်မူခြင်းလမ်းစဉ်ကိုရွေးချယ်လျှောက်လှမ်းရန်စဉ်စားဆုံးဖြတ်ခြင်းဆိုင်ရာဆီးနော့ကိုကျင်းပခဲ့သည်။ အဆိုပါဆီးနော့သည် လူငယ်များအား ယုံကြည်ခြင်းနှင့်ဆိုင်သောလက်တွေ့ကျမည့်သွန်သင်ချက်များကိုသင်ကြားပေးရန်နှင့်ဘုရားသခင်၏အလိုတော်ကိုတွေးဆဆင်ခြင်တတ်ရန်ကူညီဖေးမရမည့်အကြောင်းဖြစ်သည်။

(၂၀၁၉)ဇန္န၀ါရီလ (၂၂-၂၇) အထိ ရဟန်းမင်းကြီးဖရန်စစ်၏သက်တမ်း၌ တတိယအကြိမ်ကိုပနားမားနိုင်ငံ၌ (၆) ရက်တာကျင်းပခဲ့သည်။ ကမ္ဘာတစ်၀ှမ်းမှကက်သလစ်လူငယ်မောင်မယ် (၃) သန်းခန့် ပါ၀င်ခဲ့ကြသည်။

ဖေဖော်၀ါရီ (၄) ရက်၌ အာရပ်စော်ဘွားသမ္မဂ္ဂနိုင်ငံဖြစ်သော Abu Dhabi ၌ပူးတွဲစာစောင်တစ်ခုကို ရဟန်းမင်းကြီးဖရန်စစ်သည်Sheikh Ahmed el-Tayeb နှင့်အတူလက်မှတ်ရေးထိုးခဲ့သည်။ ထိုကြေညာချက်၏ခေါင်းစဉ်ကား 'Document on Human Fraternity for World Peace and Living Together' (ကမ္ဘာပေါ်ရှိလူသားညီအစ်ကိုမောင်နှမများ ကမ္ဘာ့ငြိမ်းချမ်းရေးကိုရှေ့ရှု၍ အတူတကွယှဉ်တွဲနေထိုင်ခြင်း) နှင့်ဆိုင်သောစာတမ်းဖြစ်သည်။ ကြေညာချက်၏အဓိကဦးတည်ချက်ကား သက်၀င်ယုံကြည်မှုမတူသော်လည်း အတူတစ်ကွငြိမ်းချမ်းစွာယှဉ်တွဲနေထိုင်၍အချင်းချင်းလေးစားတတ်သော ယဉ်ကျေးမှုကိုပိုမိုရှင်သန်အားကောင်းလာစေရန်ဖြစ်ပါသည်။

ဖေဖော်၀ါရီ (၂၁-၂၄) အထိ သာသနာအတွင်း အသက်မပြည့်သေးသူများအားစောင့်ရှောက်ကာကွယ်ခြင်းနှင့်စပ်လျင်း၍အစည်းအ‌ေ၀းကြီးကိုကျင်းပခဲ့သည်။ ထိုအစည်းအ‌‌ေ၀းကို 'လွိင်းပိုင်း ဆိုင်ရာကျူးလွန်မှုကိုအရေးယူဟန့်တားနိုင်ရန်ဗာတီကန်မှကြီးမှူးကျင်းပါသောအစည်းအ‌ေ၀းကြီး' ဟုခေါင်းစဉ်တပ်ခဲ့သည်။ အဓိကအကြောင်းအရာမှာ သာသနာအတွင်ကက်သလစ်ဘာသာရေးခေါင်း ဆောင်ကြီးများ၏လွိင်ပိုင်းဆိုင်ရာကျူးလွန်မှုများနှင့်စပ်လျင်း၍ လူကြားမကောင်းအောင် ဟိုးလေးတ ကြော်ကြော်ဖြစ်ရပ်များကိုကိုင်တွယ်ဖြေရှင်းရာဤ တာ၀န်ခံမှု၊ တာ၀န်သိမှု၊ ပွင့်လင်းမြင်သာမှုရှိ ရန်ဆွေးနွေးခဲ့ကြသည်။

အောက်တိုဘာ (၆-၂၇) အထိ အမေဇုံဒေသမှဆရာတော်ကြီးများဆီးနော့ကိုကျင်းပခဲ့သည်။ အစည်းအ‌ေ၀း၏ရည်ရွယ်ချက်မှာ အမေဇုံဒေသအတွင်း ဧ၀ံဂေလိတရားတော်ကိုအကောင်းဆုံးကြေညာဟောပြောနိုင်သောနည်းလမ်းများကိုဆွေးနွေးကြရန်ဖြစ်သည်။ သို့သော် အမေဇုံဒေသများ၌ အခြေအနေအမျိုးမျိုး၌အသုံးပြုလေ့ရှိသော အမေဇုံဒေသမှကိုယ်၀န်သည်အမျိုးသမီးတစ်ဦးပုံကို ရဟန်းမင်းကြီးသည် ဗာတီကန်၏အနီးနားရှိဘာစီးလီကာဘုရားကျောင်းတွင်ထားရှိခဲ့သောကြောင့်လည်း အငြင်းပွားဖွယ်ဖြစ်ခဲ့ပြန်သည်။

အောက်တိုဘာ (၁၃) တွင် အဂ်လီကန်ဖြစ်ခဲ့ရာမှ ကက်သလစ်သာသနာတော်ကြီးသို့ပြန်လာခဲ့သော ကာဒီနယ်ဂျွန်ဟင်းနရီနူးမန်းအား ရဟန္တာအဖြစ်တင်မြောက်ခဲ့သည်။ ကာဒီနယ်ဂျွန်ဟင်နရီနူးမန်း၏အရေးအသားများသည် အမေရိကားနှင့်အခြားသောနိုင်ငံများ၌ဘာသာရေးကောလိပ်နှင့်တက္ကသိုလ်များမဟုတ်သောကျောင်းများ၌ကျောင်းတက်နေသောကက်သလစ်ကျောင်းသူကျောင်းသားများကိုအတွေးသစ်အမြင်သစ်များစွာကိုပေးခဲ့သည်။

(၂၀၂၀)မတ်လ (၁၅) ရက်၌ ရဟန်းမင်းကြီးဖရန်စစ်သည်ဗာတီကန်မှခရူးစူးတံကျင်ဘုရားကျောင်းဆောင်ငယ်အထိလမ်းလျှောက်ဘုရားဖူးခရီးကိုပြုခဲ့သည်။ ဤသို့ပြုလုပ်ရခြင်းမှာ ကိုးဗစ် (၁၉) ကပ်ဆိုးကြီးအမြန်ဆုံးကင်း‌ေ၀းပပျောက်စေရန်ဖြစ်သည်။ ထိုခရူးစူးကားတိုင်တော်ကြီးကို လွန်ခဲ့သော (၁၅၂၂) ကလည်း ရောမမြို့သည် ပလိပ်ဂါကျရောက်ချိန်၌လည်း ကားတိုင်တော်ကိုထမ်း၍ရောမမြို့ကိုလှည့်လည်ဆုတောင်းခဲ့ရာ ကပ်ဆိုးကြီးမှလွှတ်မြောက်ခဲ့သည်။

မတ်လ (၂၇) ၌ ရဟန်းမင်းကြီးဖရန်စစ်သည် 'Urbi et Orbi' ဟုခေါ်သော 'ရောမမြို့သူမြို့သားများနှင့်ကမ္ဘာကြီးသို့ ထူးခြားသောမိန့်ခွန်းမြွတ်ကြားခဲ့သည်။ ဤမိန့်ခွန်းကို နှစ်သစ်၌တစ်ကြိမ်၊ ပါစကားတနဂ်နွေနေ့၌တစ်ကြိမ် တစ်နှစ်လျှင် (၂) ကြိမ်မိန့်ကြားလေ့ရှိသော်လည်း ထိုနှစ်၌မှုကိုးဗစ် (၁၉) ကပ်ဆိုးကြောင့် စိန့်ပီတာရင်ပြင်ကြီးသည် တိတ်ဆိတ်ခြောက်ကပ်လျှက်ရှိနေခဲ့သည်။

မတ်လ (၅-၈) ၌ရဟန်းမင်းကြီးဖရန်စစ်သည် ကိုးဗစ် (၁၉) ကပ်အလွန်ခရီးသွားလာခွင့်ပြုလိုက်သည်နှင့်သူ၏ပထမဦးဆုံးခရီးစဉ်မှာ အီရတ်နိုင်ငံဖြစ်ခဲ့သည်။ ဤခရီးစဉ်၌လည်း ရဟန်းမင်းကြီးဖရန်စစ်သည် ရှုတ်ချကန့်ကွက်ဆန့်ကျင်ကြောင်းနှင့်ငြိမ်းချမ်းရေးကိုတိုးမြင့်လုပ်ဆောင်ကြရန်တိုက်တွန်းသောကြေညာစာတမ်းကိုလက်မှတ်ရေးထိုးခဲ့သည်။

ဇူလိုင် (၃) ရက်နေ့၌ ကာဒီနယ်များအဖွဲ့၏တာ၀န်ခံအဖြစ်ရဟန်းမင်းကြီးဖရန်စစ်မှရွေးချယ်ခန့်အပ်ခံလိုက်ရသောကာဒီနယ် Giovanni Angelo Becciu ငွေကြေးခ၀ါချမှုနှင့်အခြားပြစ်မှုများကျူးလွန်မှုစွက်စွဲချက်ဖြင့် ဗာတီကန်တရားရုံး၌အမှုရင်ဆိုင်ခဲ့ရသည်။

ဇူလိုင် (၄) ရက်နေ့၌ ရဟန်းမင်းကြီးဖရန်စစ်သည် အူမကြီးခွဲစိတ်မှုကိုခံယူခဲ့သည်။ ဤခွဲစိတ် မှုသည် သက်ကြီးများ၌ဖြစ်တတ်သောရောဂါတစ်ခုဖြစ်သည်။ ခွဲစိတ်ပြီးနောက် (၁၀) ရက်အကြာသက်သာလာသောကြောင့်ဆေးရုံမှဆင်းလာခဲ့သည်။

ဇူလိုင် (၁၆) ရက်၌မူ 'motu proprio titled Traionis custodes' ကိုကြေညာခဲ့သည်။ ထိုကြေညာချက်ကား မစ္ဆားတရားတော်မြတ်ကို 'လာတင်း' ဘာသာဖြင့်ပူဇော်ခြင်းကိုမပူဇော်ရန်နှင့်ပူဇော်ပါကအရေးယူခံရမည်ကြေညာချက်ဖြစ်သည်။

ဒီဇင်ဘာ (၂-၆) တွင် ရဟန်းမင်းကြီးသည် ဆိုက်ပရပ်စ်နှင်ဂရိနိုင်များသို့တမန်တော်ခရီးကြွရောက်ခဲ့ပြန်သည်။ ရဟန်းမင်းကြီးသည် ဂရိကျွန်းဖြစ်သော 'Lesbos' သို့နောက်တကြိမ်ကြွရောက်၍ ရွေ့ပြောင်းများအားသွားရောက်တွေ့ဆုံအားပေးခဲ့သည်။

(၂၀၂၂)ဇန္န၀ါရီ (၁၁) ၌ ရဟန်းမင်းကြီးဖရန်စစ်သည် ကြိုတင်ပြောဆိုထားခြင်းမရှိဘဲ ရောမမြို့ရှိ'StereoSound' ဟုခေါ်သောဓာတ်ပြားဟောင်းများရောင်းသည့်ဆိုင်သို့ ရုတ်တရက်သွားရောက်ခဲ့သည်။ ရဟန်းမင်းကြီးသည် ဂန္ဓ၀င်သီချင်းများကိုနှစ်ခြိုက်သည်။ ထိုစတိုးဆိုင်သည်ပြန်လည်မွမ်းမံထားသောကြောင့် ကောင်းချီးပေးဆုတောင်းပေးခဲ့သည်။

မတ်လ (၁၉) ၌လည်း ရဟန်းမင်းကြီးသည် 'Praedicate evangelium' (ဧ၀ံဂေလိတရားကို ဟောပြောကြလော့) ကိုကြေညာခဲ့သည်။ ဤကြေညာချင်နှင့်အတူ ရဟန်းမင်းကြီး၏ဖွဲ့စည်းအုပ်ချုပ်ပုံကိုပြန်လည်ပြုပြင်ခဲ့သည်။ ထိုပြုပြင်ပြောင်းလဲမှု၌ ဧ၀ံဂေလိတရားတော်ကိုအသားပေးထားပြီး၊ ကက်သလစ်ဘာသာတူများအား သာသနာအတွင်း၌ ခေါင်းဆောင်မှုနေရာများကိုဖန်တီးပေးရေးကိုဦး စားပေးထားသည်။

မေလ (၁၅) ရက်၌ ရဟန်းမင်းကြီးဖရန်စစ်သည် ဘီးတပ်လှည်ပေါ်၌လိုက်ပါလျှက် ဘုရားဖူးများရှေ့မှောက်သို့ထွက်ကြွလာသည်ကိုစိတ်မကောင်းဖွယ်မြင်တွေ့ခဲ့ရသည်။ အဘယ်ကြောင့်ဆိုသော် ရဟန်းမင်းကြီးသည် ဒူးခေါင်း‌ေ၀ဒနာခံစားနေခဲ့ရသည်မှာလနှင့်ချီကြာပြီဖြစ်သည်။

ဇူလိုင် (၂၄-၃၀) ရက်များ၌ ရဟန်းမင်းကြီးသည် ကနေဒါနိုင်ငံသို့ပထမဦးဆုံးအကြိမ်တမန်တော်ခရီးကြွရောက်ခဲ့သည်။ ထိုခရီးစဉ်၌ အတိတ်က သာသနာပြုများ၏ ဌာနီတိုင်းရင်းသားများအပေါ်ကြမ်းတမ်းသောပြုမူဆောင်ရွက်ခဲ့မှုများအားလုံးအတွက်တောင်းပန်ခဲ့သည်။

(၂၀၂၃)ဇန္န၀ါရီ (၃၁) မှ ဖေဖော်၀ါရီ (၅) ရက်နေ့တွင် ရဟန်းမင်းကြီးဖရန်စစ်သည် ကွန်ဂိုသမ္မတနိုင်ငံနှင့်တောင်ဆူဒန်နိုင်ငံများသို့ကြွရောက်ခဲ့သည်။ ထိုအတောအတွင်း နိုင်ငံအတွင်း အကြမ်းဖက်မှုများကိုပြင်းပြင်းထန်ထန်ရှုတ်ချကန့်ကွက်ခဲ့ပြီး ငြိမ်းချမ်းရေးကိုတိုးမြှင့်လုပ်ဆောင်ရန်တိုက်တွန်းခဲ့သည်။ ရဟန်းမင်းကြီးဖရန်စစ်သည် Canterbury ၏အဂ်လီကန်ဂိုဏ်းချုပ်ဆရာတော် Justin Welby နှင့်စကော့တလန်မှ Greenshields ဘာသာရေးခေါင်းဆောင်တို့နှင့်ခရစ်ယာန်များစည်းလုံးညီညွှတ်မှုရရှိရေးဆုတောင်းခြင်းအစီအစဉ်သို့လည်းတက်ရောက်ခဲ့သည်။ 

အာဗီအေဘာသာပြန်-ဖာသာရ်ကလဲမင့်အားတယ်

Photo courtesy: CNA

https://bit.ly/3yD1lnb

Add new comment

1 + 11 =