ပုပ်ရဟန်းမင်းကြီး ဖရန်စစ် အရှင်သူမြတ်၏ ၅၄ ကြိမ်မြောက် ကမ္ဘာ့လူထုဆက်သွယ်ရေးနေ့ မင်္ဂလာသတင်းစကား

ပုပ်ရဟန်းမင်းကြီး ဖရန်စစ် အရှင်သူမြတ်၏ ၅၄ ကြိမ်မြောက် ကမ္ဘာ့လူထုဆက်သွယ်ရေးနေ့ မင်္ဂလာသတင်းစကား

၂၄ ၊ ဇန်နဝါရီလ၊ ၂၀၂၀ ၊ ရှင်ဖရန်စစ် ဒီဆေးပွဲနေ့

သီကိုရှင်း (ဆီလျော်အောင် ဘာသာပြန်ဆိုသည်)

ဘဝသည် သမိုင်းဖြစ်လာ၏
~~~~~~~~~~~~~~~~

"သင်တို့၏သားမြေးများအား ပြောကြားစေရန်အလို့ငှာ" (ထွက်မြောက်ရာကျမ်း ၁၀ း ၂)

ယခုနှစ်အတွက် သတင်းစကားကို ဇာတ်လမ်းပြောခြင်းပုံစံဖြင့် ကျွနု်ပ် ပြုလုပ်ဝေမျှသွားပါမည်။ ပုံပြင်၊ ဇာတ်လမ်း ကောင်းများထဲ၌ ပါဝင်သည့် အမှန်တရားကို ကျွနု်ပ်တို့ကိုယ်ပိုင်အဖြစ် ပြုလုပ်ကြရန် လိုအပ်လာသည်ဟု ကျွနု်ပ် ယုံကြည်မိသည်။ ဖြိုခွဲခြင်းမဟုတ်ဘဲ တည်ဆောက်ခြင်းကို ဖြစ်စေသော ဇာတ်လမ်း၊ ကျွနု်ပ်တို့၏ မူလဇစ်မြစ်ကို ပြန်လည်ရှာဖွေနိုင်သော ဇာတ်လမ်းနှင့် အနာဂတ်သို့ချီတက်ရန် ခွန်အားကို ဖြစ်စေသော ဇာတ်လမ်းအဖြစ်အပျက်များ ဖြစ်သည်။ ကျွနု်ပ်တို့ပတ်ဝန်းကျင်၌ ကြားနေရသည့် ရှုပ်ထွေးစေသောအသံများနှင့် သတင်းစကားများကြားမှာ ကျွနု်ပ်တို့ အကြောင်းနှင့် ကျွနု်ပ်တို့အနီးမှာရှိသော အလှတရားများကို ပြောပြနိုင်သည့် လူ့ဇာတ်လမ်းတစ်ပုဒ် လိုအပ်သည်။ ကမ္ဘာကြီးကို အသိမှတ်ပြုပြီး ဖြစ်ပျက်နေသော အရာခပ်သိမ်းကို ညင်သာသိမ်မွေ့စွာ စောင့်ငဲ့ကြည့်နိုင်ရန် ဇာတ်ကြောင်း ပြောပြရမည်။ ကျွနု်ပ်တို့သည် ရှင်သန်ခြင်း၏ တစ်စိပ်တစ်ပိုင်းဖြစ်ပြီး တစ်ဦးနှင့်တစ်ဦး ရောယှက်ဆက်နွယ်မှုရှိကြောင်း ပြောပြနိုင်သည့် ဇာတ်လမ်းပုံပြင်မျိုး ဖြစ်သည်။

၁။ ရောယှက်နေသော ဘဝဇာတ်လမ်းများ

လူသားများသည် ပုံပြောကြသူများဖြစ်သည်။ ကလေးဘဝမှစ၍ အစားသောက်ကို ခုံမင်သကဲ့သို့ ပုံပြင်များကို ဆာငတ်ကြသည်။ ယုံတမ်းပုံပြင်ဖြစ်စေ၊ ဝတ္ထု၊သီချင်းပုံစံဖြစ်စေ ပုံပြင်များက သတိမပြုမိဘဲလျှက် ကျွနု်ပ်တို့ဘဝကို လွှမ်းမိုး ထားနိုင်သည်။ ကျွနု်ပ်တို့ဖန်တီးထားသည့် ပုံပြင်ဇာတ်ကောင်များ၏ အကျင့်စိတ်ထားများအပေါ်မူတည်ပြီး အမှား၊အမှန် ခွဲခြား ဆုံးဖြတ်လေ့ရှိသည်။ ပုံပြင်ထဲက ဇာတ်ကောင်စရိုက်များက စွဲထင်ကျန်ရစ်စေနိုင်သည်။ ခံယူချက်များ၊ အပြုအမှုများ ကို ပုံဖော်တည့်မတ်ပေးနိုင်သည်။ ကျွနု်ပ်တို့ ဘယ်သူလဲဆိုတာ သိရှိနိုင်ရန် ပုံပြင်များက အထောက်အကူပြုနိုင်သည်။

ကျွနု်ပ်တို့၏ အရှက်တရားကို ကာကွယ်ရန်သက်သက်ဖြင့် အဝတ်အစားဝတ်ရမည်မဟုတ်ပါ။ (ကမ္ဘာဦးကျမ်း ၃ း၂၁) ကျွနု်ပ်တို့၏ ဘဝကို ကာကွယ်ရန်အတွက်လည်း ပုံပြင်ဇာတ်လမ်းများဖြင့် အဝတ်အစားဝတ်ရန် လိုအပ်ပေသည်။ အဝတ်အစားတစ်ခုကိုပဲ ချုပ်လုပ်ကြသည်မဟုတ်ဘဲ ဘဝဇာတ်လမ်းများကိုလည်း ဖန်တီးချုပ်လုပ်ကြသည်။ လူ၏ ချုပ် လုပ်နိုင်သော အစွမ်းအစသည် ဘဝကိုဖန်တီးချုပ်လုပ်ထားသော မှတ်တမ်းရာဇဝင်ကို ဖြစ်စေသည်။ ခေတ်အဆက်ဆက် က ပုံပြင်တိုင်းမှာ တူညီရာတစ်ခုရှိသည်။ သူတို့၏ ဇာတ်လမ်းထဲမှာ သူရဲကောင်းများစွာ ရှိသည်။ အိပ်မက်တစ်ခုကို ဖမ်းဆုပ်ရင်း ဒုက္ခအခက်များစွာကို ကြုံတွေ့ရင်ဆိုင်ရသည့် နေ့စဉ်ဘဝထဲက သူရဲကောင်းများလည်း ပါဝင်သည်။ ထိုသူရဲကောင်းများသည် တစ်စုံတစ်ခုသော တွန်အားတစ်ခုကြောင့် သတ္တိရှိလာကြသည်။ ချစ်တတ်လာကြသည်။ ပုံပြင်ဇာတ်လမ်းထဲမှာ နစ်မျောစီးဝင်သွားသည့်အခါ ဘဝ၏စိန်ခေါ်မှုများကို သတ္တိရှိစွာရင်ဆိုင်နိုင်သော အကြောင်းတရား များလည်း ဖြစ်လာရသည်။

လူသားများသည် ပုံပြောသူများဖြစ်ကြသည်။ အဘယ့်ကြောင့်ဆိုသော် လူဟူသည် အဆက်မပြတ်ကြီးထွားနေရ သည်။ မိမိကိုယ်ကို ပြန်လည်ရှာဖွေနေကြသည်။ နေ့တဓူဝ ဘဝဇာတ်ခုံ အဖုံဖုံကြားမှာ ရှင်သန်ရင့်ကျက်လာကြသည်။ သို့သော်လည်း အစဦး၌ပင် ကျွနု်ပ်တို့၏ ဇာတ်လမ်းသည် ခြိမ်းခြောက်ခံလိုက်ရသည်။ အပြစ်ဒုစရိုက်သည် လူ့သမိုင်းတစ်ခု ကို ရက်စက်စွာပင် သစ်စိမ်းချိုး ချိုးရက်နိုင်ခဲ့လေသည်။

၂။ ပုံပြင်ဇာတ်လမ်းတိုင်းသည် ကောင်းသောအဖြစ်အပျက်များမဟုတ်

"မင်း ဒါကိုစားရင် ဘုရားလိုဖြစ်မှာ" (ကမ္ဘာဦးကျမ်း ၃ း ၄) ။ နတ်ဆိုး၏ နှောက်ယှက်စကားသံက လူ့ဇာတ်လမ်းတစ်ပုဒ်ကို ဖြေဆည်မရအောင် ဖျက်ဆီးရန် ဖြည်းညင်းစွာ ဝင်ရောက်လာခဲ့သည်။ "မင်း ပိုင်ဆိုင်ရင်၊ မင်း ဒီလို ဖြစ်လာရင်၊ မင်း အောင်မြင်လာလိမ့်မယ်"။ ထိုစကားများသည် ခေါင်းပုံဖြတ် အမြတ်ထုတ်ရန် အကြံနှင့် ပြောသော သွေးထိုးစကားများပင်။ ကျွနု်ပ်တို့ကို ဘယ်ပုံပြင်ဇာတ်လမ်းများက ထင်ယောင်ထင်မှား ဖြစ်စေပြီလဲ။ ပျော်ရွှင်မှုရရန် ပိုင်ဆိုင်မှဖြစ်မည်၊ သုံးဖြုန်းနိုင်မှ ဖြစ်မည်ဟူသော အတွေးမျိုး ဖြစ်စေပြီလား။ လောဘတကြီးနဲ့ အာဝဇွန်းရွှင်ရွှင် အတင်း အုပ်ခြင်းကို သတိမထားမိဘဲ လုပ်နေမိတတ်သည်။ အကြမ်းဖက်မှု၊ ပိုဆိုးသည်မှာ အမှားကို ဖက်တွယ်ထားမှုများကို ဘယ်လောက်တောင် ပြုမိနေကြပြီလဲ။ အချင်းချင်းဆက်သွယ်နေသည့် ဝန်းကျင်တစ်ခုမှာ လူမှု ယဉ်ကျေးမှု နှောင်ဖွဲ့ခြင်း များကို အားဖြည့်တည် ဆောက်ရမည့်အစား ပြိုကွဲပျက်စီးစေသော အပျက်သဘောဆောင်သည့် ဇာတ်လမ်းအကြောင်း အရာများသာ ပြောဆို တွေ့မြင်နေရသည်။ ခိုင်မာမှုမရှိိသော သတင်းအသေးအမွှားလေးများစုစည်းမိခြင်း၊ အားနည်းချက် ကို သိသာမြင်သာစေရန် သာသာနှင့်နာနာ ထိုးနှက်ခြင်း၊ သံသယများဖြင့် ငြင်းခုံခြင်း၊ အမုန်းပွားသည့် အမုန်းစကားများ ပေးပို့ခြင်းများသည် လူ့သမိုင်းတစ်ခုကို ချုပ်လုပ်ရာ၌ အထောက်အကူမပြုပေ။

အာဏာ၊ ပါဝါ မကျမောသညျ့ ဇာတျလမျးပုံပွငျမြား၌ ဇာတျကောငျစရိုကျတို့သညျ သကျဆိုးမရှညျကွပါ။ ဇာတျလမျးကောငျးမြားမှာ အခြိနျနရောကိုကြောျ၍ လတျဆတျျနကော ဘဝအတှကျ အားဖွစျစသေညျ။ အတုက အစစျသဖှယျ ထငျယောငျထငျမှားခွငျးမြားစှာဖွစျနသေညျ့ ယနေ့ခတျေမှာ စစျမှနျ၊ လှပ၊ ကောငျးမှနျသညျ့ ဇာတျလမျးမြားကို ကွိုဆို ဖနျတီးကာ တညျဆောကျနိုငျရနျ ပညာအမွောျမွငျလိုအပျလာသညျ။ ဒုက်ခအခကျခဲကွားမှာ ပပြောကျမသှားရနျ ကူညီပေးမညျ့ ဇာတျလမျးမြားကို ရှာဖှနေိုငျရနျ စိတျရှညျသညျးခံခွငျး၊ ဆနျးစစျသုံးသပျခွငျးမြားလညျး လိုအပျလာသညျ။ ကြှနုျပျတို့ ဘယျသူလဲ၊ နေ့စဉျဘဝထဲမှာ မသိမသာလှှမျးမိုးနသေညျ့ ဘဝသူရဲကောငျးမြားကို ရှာဖှရေနျ ဘဝဇာတျလမျးမြား လိုအပျပါသညျ။

၃။ အဖြစ်အပျက်ဇာတ်လမ်းများ၏ ဇာတ်လမ်းတစ်ပုဒ်

သမ္မာကျမ်းစာသည် ပုံပြင်အဖြစ်အပျက်များစွာ၏ ဇာတ်လမ်းတစ်ပုဒ်ပင်ဖြစ်သည်။ အတိတ်က အဖြစ်အပျက်၊ လူပုဂ္ဂိုလ်များစွာနှင့် ကျွနု်ပ်တို့ရှေ့မှာ ဇာတ်လမ်းပေါင်းမည်မျှ ခင်းကျင်းဖြစ်တည်ခဲ့ပြီလဲ။ ဘုရားသခင်သည် ဖန်ဆင်းရှင် ဖြစ်ပြီး ဤအဖြစ်အပျက်များ၏ ပဲ့ကိုင်ရှင်လည်းဖြစ်သည်။ ကိုယ်တော်၏ နှုတ်ကပါဌ်တော်ဖြင့် အရာခပ်သိမ်းတို့သည် တည်ရှိလာကြရ၏ (ကမ္ဘာဦး ၁) ဘုရားသခင်သည် ခပ်သိမ်းသောအရာဟူသမျှကို အသက်ဝင်စေပြီး လူယောက်ျားနှင့် လူမိန်းမကို ဖန်ဆင်းခြင်း၏ အထွတ်အထိပ်မှာ ထားရှိကာ ကိုယ်တော်၏ အသက်တာ၌ လွတ်လပ်စွာ ပါဝင်စေခဲ့သည်။ လူသည်လည်း ဘုရားသခင်နှင့်အတူ သမိုင်းတစ်ခုကို ဖန်တီးလေသည်။ ဆာလံကျမ်း ၁၃၉ ၌ ဖန်ဆင်းခံသတ္တဝါများက ဖန်ဆင်းရှင်ဘုရားသခင်ကို ချီးမွမ်းထားသည်။ "အကြောင်းမူကား ကိုယ်တော်သည် အကျွနု်ပ်၏ ခန္ဓာကိုယ်အတွင်းရှိ အစိတ်အပိုင်းများကို ဖန်ဆင်း၍ အကျွနု်ပ်ကို အမိဝမ်းတွင်း၌ အတူတကွ ဆက်စပ်ထားတော်မူ၏။ ကိုယ်တော်သည် ကြောက်ရွံ့အံ့သြဖွယ်ကောင်းသောကြောင့် အကျွနု်ပ်သည် ကိုယ်တော်ကို ချီးမွမ်းထောပနာပြုပါ၏။ ကိုယ်တော် ပြုလုပ် တော်မူသော အမှုအရာတို့သည် ထူးဆန်းအံ့သြဖွယ်ကောင်းပါ၏။ အကျွနု်ပ်သည် မထင်မရှားသော နေရာတွင် ဖန်ဆင်းခံရ၍ ကမ္ဘာမြေကြီးအောက်နက်ရှို်င်းသော အရပ်၌ သေချာစွာ ပုံသွင်းခြင်းခံရချိန်တွင် အကျွနု်ပ်၏ အရိုးတို့သည် ကိုယ်တော်၏ မျက်မှောက်တော်မှ ဖုံးကွယ်ခြင်းမရှိပါ" (ဆာလံ ၁၃၉း ၁၃-၁၅)။ ကျွနု်ပ်တို့သည် ပြည့်စုံသော လူသားများအဖြစ် မွေးဖွာလာကြသည် မဟုတ်။ သို့သော် အစဉ်မပြတ် ပုံသွင်းတည်ဆောက် ဆက်နွယ်နေကြသည်။ နက်နဲလှ သော ကျွနု်ပ်တို့၏ ဘဝအသက်များကို ဆက်လက် ပုံဖော်ဆက်စပ်ကြရန် ဘဝက ဖိတ်ခေါ်နေသည်။

ထို့ကြောင့် သမ္မာကျမ်းစာသည် ဘုရားနှင့်လူကြားက မေတ္တာဇာတ်လမ်းတစ်ပုဒ်ပင်ဖြစ်သည်။ သမ္မာကျမ်းစာသည် ယေဇူးဘုရားကို ဗဟိုပြုကာ ကိုယ်တော်၏ ဇာတ်လမ်းဖြင့် ဘုရားက လူသားများအပေါ်ထားရှိသည့်မေတ္တာ၊ လူက ဘုရားအပေါ်ထားရှိိသည့် မေတ္တာဇာတ်လမ်းတို့ကို ပြည့်စုံစေခဲ့သည်။ ထိုအတွက်ကြောင့်၊ ခေတ်အဆက်ဆက်တိုင်းမှာ ယောက်ျား၊ မိန်းမ ဟူသမျှသည် ဇာတ်လမ်းပေါင်းများထဲက ဇာတ်လမ်းတစ်ခုဖြစ်သည့် မေတ္တာဇာတ်လမ်းကို ဖော်ဆောင် ကြရန် အခေါ်ခံရခြင်းဖြစ်သည်။ ဤသည်မှာ ဆက်သွယ်ခြင်း၏ အကောင်းဆုံး အဓိပ္ပါယ်တစ်ခုပင်။

ယခုနှစ်သတင်းစကားကို ထွက်မြောက်ရာကျမ်းမှ အခြေပြုကာ ယူထားသည်။ ဘုရားသခင် ရွေးကောက်တော်မူ သော မိမိလူမျိုးများ၏ ဘဝသမိုင်းမှာ ဘုရားသခင်ကိုယ်တိုင် ပါဝင်ဆက်နွယ်ထားသည်။ ကျွန်အဖြစ် ဖမ်းဆီးခံရသည့် အီစရာအဲလ် ကလေးငယ်များ ဘုရားသခင်ထံ ငိိုကြွေးအော်ဟစ်ကြသည့်အခါ ဘုရားသခင်သည် နားညောင်းတော်မူ၍ မိမိနှင့် အာဘရာဟံ၊ အီဇက်၊ ယာကုပ်တို့နှင့် ချုပ်ဆိုထားသော ပဋိညာဉ်ကို သတိရအောက်မေ့တော်မူသည်။ ကိုယ်တော်၏ သတိရအောက်မေ့ခြင်းသည် အံ့ဖွယ် တန်ခိုးလက္ခဏာများဖြင့် အီစရာအဲလ်လူမျိုးတို့အား လွတ်မြောက်စေခဲ့သည်။ ထို့နောက်မှ မိုးဇယ်အား ထို တန်ခိုးလက္ခဏာများ၏ အဓိပ္ပါယ်ကို ဖွင့်ဆိုပြခဲ့သည်။ "အီဂျစ်ပြည်၌ ငါပြုသောအမှု၊ ငါပြသော နိမိတ်တို့ကို သင်တို့၏ သားမြေးတို့အား ကြားပြောသဖြင့် ငါသည် ထာဝရဘုရားဖြစ်ကြောင်း သိစေကြလော့" (ထွက်မြောက်ရာကျမ်း ၁၀ း ၂)။ အီဂျစ်ပြည်မှ ခေါ်ဆောင်ရာတွင် ကြုံတွေ့ခဲ့ရသည့်အဖြစ်အပျက်အားဖြင့် သူတို့ဘဝထဲ၌ ဘုရားသခင် မည်သို့ တည်ရှိပေးခဲ့ကြောင်း ပုံပြင်တစ်ပုဒ်ပမာ ဘုရားသခင်၏ ရွှေဉာဏ်တော်သည် သားစဉ်မျိုးဆက် ပြန်၍ လက်ဆင့်ကမ်းပေးခဲ့သည်။ အသက်၏ ဘုရားသခင်သည် အသက်ဝင်သော ဇာတ်လမ်းအဖြစ်အပျက်များဖြင့် ကျွနု်ပ်တို့ အား ဆက်သွယ်နေလေသည်။

ယေဇူးဘုရားက ဘုရားသခင်အကြောင်း ဟောကြားရာတွင် စိတ်ကူးယဉ်အတွေးများနှင့်မဟုတ်ဘဲ နေ့စဉ်ဘဝထဲ မှာ ဖြစ်ပျက်နေသည့် အကြောင်းအရာများကို အခြေခံပြီး ဥပမာ၊ သာဓက၊ ပုံပြင်များဖြင့် မိန့်ကြားခဲ့သည်။ ဤအချက်၌ ဘဝ အတွွေ့ကြုံများက ပုံပြင်ဇာတ်လမ်းများ ဖြစ်လာပြီး၊ နားထောင်သူ ကျွနု်ပ်တို့အတွက် ပုံပြင်ဇာတ်လမ်းများက ဘဝဖြစ်လာ သည်။ ဇာတ်လမ်းပုံပြင်သည် နားထောင်သူ ပရိသတ်၏ ဘဝ တစ်စိပ်တစ်ပိုင်း ဖြစ်လာပြီး ပြောင်းလဲခြင်းများဖြစ်လာသည်။ ဧဝံဂေလိကျမ်းစာများသည်လည်း ဇာတ်လမ်းများဖြစ်သည်။ သို့သော် မတော်တဆ ဖြစ်လာသည်မဟုတ်။ ခရစ်တော် အကြောင်း ပြောပြသောအခါ ထို အဖြစ်အပျက်သည် အသက်ဝင်လာသည်။ ခရစ်တော်နှင့် တူအောင် ပြုနိုင်သည်။ ဖတ်ရှုသူ ပရိသတ်ကိုလည်း တူညီသော ယုံကြည်ခြင်းကို တူညီသောဘဝများထဲမှာ ဝေမျှကြရန် တောင်းဆိုနေပေသည်။ ရှင်ယောဟန်ကျမ်းစာ၌ ဇာတ်လမ်းဖန်တီးပဲ့ကိုင်ရှင် ဘုရား၏နှုတ်ကပါဌ်တော်ကိုယ်တိုင် ဇာတ်လမ်းတစ်ပုဒ်ဖြစ်လာခဲ့သည်။ "ခမည်းတော်၏ ရင်ခွင်တော်၌ ရှိတော်မူသော တစ်ပါးတည်းသော သားတော်သည် ဘုရားသခင်ကို ထင်ရှားစေတော်မူ၏" (ယောဟန် ၁ း ၁၈)။ ဘုရားသခင်သည် လူ့သမိုင်းထဲ၌ ကိုယ်တိုင်ကိုယ်ကျ ပါဝင်ဆက်နွယ်လာခဲ့ကာ ကျွနု်ပ်တို့၏ ဘဝ ဇာတ်လမ်းများကိုလည်း သူနှင့်အတူ ရောစပ် ဆက်နွယ်ကြရန် လမ်းကြောင်းသစ်ကို ချပြပေးခဲ့ပါသည်။

၄။ ထာဝရ မွမ်းမံထားသော ဇာတ်လမ်းတစ်ပုဒ်

ခရစ်တော်၏ ရာဇဝင်သည် အတိတ်မှာ ဖြစ်ခဲ့သော သမိုင်းဝင်အဖြစ်အပျက်သက်သက်မဟုတ်။ ခရစ်တော်၏ ဇာတ်လမ်းသည် ကျွနု်ပ်တို့၏ ဇာတ်လမ်းဖြစ်သည်။ အချိန်တိုင်း ဆန်းသစ်နေဆဲပင်။ ခရစ်တော်၏ လူ့အဖြစ်ယူခြင်းက လူသားများ အတွက် ဘုရားသခင်၏ အလေးပေး စိတ်ဝင်စားမှုကို ပြသနေသည်။ လူသားတိုင်း၏ ဘဝဇာတ်လမ်းများသည် သာမညမဟုတ်ဘဲ ဘုရားသခင်အတွက် ပဓါနကျလွန်းလှသည်။ ဘုရားသခင်၏ ဘဝသည် ဇာတ်လမ်းတစ်ပုဒ်ဖြစ်ခဲ့လေ သောကြောင့် လူတိုင်း၏ ဘဝဇာတ်လမ်းများသည် ဘုရားပါသော မြင့်မြတ်သည့် ဘဝဇာတ်လမ်းများဖြစ်လာခဲ့ပေသည်။ လူအယောက်စီတိုင်း၏ ဘဝအဖြစ်အပျက်တိုင်းမှာ ဘုရားသခင် လောကသို့ ဆင်းကြွလာရသည့် ဇာတ်လမ်းကို ပြန် မြင်တွေ့ရသည်။ လူတိုင်း၏ ဘဝဇာတ်လမ်းများသည် အစားထိုးမရသော သိက္ခာများနှင့် ပြည့်နေတော့သည်။ အကျိုးဆက် အားဖြင့် ခရစ်တော် ချီးမြောက်မြင့်တင်ပေးခဲ့သော ဘဝဂုဏ်သိက္ခာကို လူသားတိုင်းက ခံယူရန် ထိုက်တန်စေခဲ့ပါသည်။

"သင်တို့သည် ခရစ်တော်ထံမှ စာဖြစ်၍ ငါတို့အားဖြင့် ပေးပို့ခြင်းခံရကြောင်းမှာ ထင်ရှားလျှက်ရှိ၏။ ဤစာကို မှင်ဖြင့်မရေးဘဲ အသက်ရှင်သော ဘုရားသခင်၏ ၀ိညာဉ်တော်ဖြင့် ရေးသားထားခြင်းဖြစ်ပြီး ကျောက်ပြားပေါ်တွင် ရေးထား သည်မဟုတ်ဘဲ လူတို့၏ နှလုံးသားများပေါ်တွင် ရေးထားခြင်း ဖြစ်၏" (ဒု ကောရိန်သု၊ ၃ း ၃) ဟု ရှင်ပေါလူးက ရေးသား ထားခဲ့သည်။ ဘုရားသခင် ချစ်ခြင်းမေတ္တာတော်ဖြစ်သည် သန့်ရှင်းသော ၀ိညာဉ်တော်သည် ကျွနု်ပ်တို့အတွင်း၌ ရေးသား နေ၏ ။ ၀ိညာဉ်တော်က ဘုရားသခင်၏ ကောင်းမြတ်ခြင်းကို ရေးသားပြီး အစဉ်မပြတ် သတိပေးနေသည်။ သတိပေးခြင်း ဆိုသည် မှာ စိတ်ထဲ၌ ပေါ်လွင်ပြီး နှလုံးသား၌ ရေးသားထားရန်ဖြစ်သည်။ သန့်ရှင်းသော ၀ိညာဉ်တော်၏ အစွမ်းတန်ခိုးဖြင့် မေ့လျော့ခံရသော၊ ကြေမွပျက်ဆီးနေသော ဘဝများသည်ပင် ရဟန္တာ သြဂုတ်စတင်းကဲ့သို့၊ ရဟန္တာ အစ်ဂနေးရှစ်ကဲ့သို့၊ ပေါလူးတစ်ဖြစ်လဲ စောလူးကဲ့သို့ သူတစ်ပါးအတွက် လှုံ့ဆော်အားပေးနိုင်သော ပြောင်မြောက်သည့် အစွမ်းအစများ ရှိလာသည်။ ထိုသူတို့၏ ဘဝအဖြစ်အပျက်များ၌ ဘုရားသခင်၏ လွတ်လပ်ခြင်းနှင့် လူ၏လွတ်လပ်ခြင်းတို့ ထိပ်တိုက်လွန် ဆွဲကြသည်ကို တွေ့ရ၏။ ဘုရားသခင်၏ မေတ္တာသတင်းကောင်း အငွေ့အသက်များ ရိုက်ခတ်နေသည့်၊ မတူညီသော ဘဝအဖြစ်အပျက်များစွာ ရှိသည်ကို ကျွနု်ပ်တို့ သိကြသည်။ ကျွနု်ပ်တို့၏ ထိုအဖြစ်များကို မျှဝေရမည်။ ခေတ်အဆက်ဆက် မှာ ဘာသားစကားအမျိုးမျိုးနှင့် ကြားခံနည်းအမျိုးမျိုးကို အသုံးပြုကာ ကြားသိစေရမည်ဖြစ်သည်။

၅။ ကျွနု်ပ်တို့အား အသစ်မွမ်းမံပေးသည့် ဇာတ်လမ်းတစ်ပုဒ်

ကျွနု်ပ်တို့ ဘဝဇာတ်လမ်းများသည် ဇာတ်လမ်းကြီးတစ်ပုဒ်၏ အပိုင်းတစ်ခုဖြစ်လာသည်။ ကျမ်းစာတော်မြတ်ထဲ က ဘဝအဖြစ်အပျက်များ၊ ရဟန္တာတို့၏ အထုပ္ပတ္တိများကို ဖတ်ကြည့်ပါလျှင် သန့်ရှင်းသောဝိညာဉ်တော်ဘုရားသည် ကျွနု်ပ်တို့ နှလုံးသားထဲ၌ လွတ်လပ်စွာ ရေးသားလှုပ်ရှားနေသည်ကို တွေ့ရသည်။ သန့်ရှင်းသော ၀ိညာဉ်တော်က ဘုရား သခင်ရှေ့၌ ကျွနု်ပ်တို့ မည်သူမည်ဝါ ဖြစ်ကြောင်း ပြန်လည် သိမြင်စေသည်။ ကျွနု်ပ်တို့အား ဖန်ဆင်းကာ ကယ်တင်တော် မူသည့်မေတ္တာအကြောင်း သတိရသည့်အခါ၊ နေ့စဉ်ဘဝအဖြစ်အပျက်များ၌ မေတ္တာတရားကို ဖြစ်စေသည့်အခါ၊ ဘဝဒုက္ခ များအလယ် ကရုဏာသနားခြင်းများနှင့် ဘဝကို ဆက်စပ်ရောယှက်လိုက်သည့်အခါ ကျွနု်ပ်တို့သည် နောက်ထပ် စာမျက် နှာအသစ်တစ်ရွက်ကို လှန်လိုက်သည်။ နှလုံးသားကို လေးလံစေသည့် နောင်တနှင့် ဝမ်းနည်းခြင်းများဖြင့် ချည်နှောင် ကျန်ရစ်စေခြင်းမရှိဘဲ သူတစ်ပါးအတွက် ကျွနု်ပ်တို့ဘဝစာမျက်နှာကို ဖွင့်ပေးလိုက်ခြင်းအားဖြင့် ဘုရားသခင်၏ စီမံကိန်းကို ဖွင့်ပြလိုက်ခြင်းဖြစ်သည်။ ကျွနု်ပ်တို့ဘဝအဖြစ်အပျက်တိုင်းက သုံးမရအောင် စုတ်ပြတ်နေသည်မဟုတ်။ မထူးခြားသည့် ဘဝဖြစ်နေခဲ့ရင်တောင် အဓိပ္ပါယ်များက ပြောင်းလဲနိုင်သည်။ မိမိတို့ဘဝ ဇာတ်လမ်းကို ဘုရားသခင်အား ပြောပြခြင်းသည် ဘုရားသခင်၏ ကြင်နာတတ်သော မေတ္တာတရား၌ ချဉ်းကပ်ဝင်ရောက်လိုက်ခြင်းပင်။ ကြုံတွေ့ရသည့် ဘဝအဖြစ်အပျက် များ၊ စရိုက်စုံသော လူများနှင့် ဖြတ်သန်းရသည့်ဘဝဇာတ်လမ်းကို ဘုရားသခင််အား ပြောပြနိုင်သည်။ ဘုရားသခင်နှင့် အတူ မျက်ရည်၊ အပြုံး၊ အရှုံး အနိုင်များကြားမှာ ဘဝကို ပြန်လည် ဆက်စပ်တည်ဆောက်ရပေဦးမည်။

ဘဝဇာတ်လမ်းများ၏ ပဲ့ကိုင်ဖန်တီးရှင် ဘုရားသခင်နှင့်အတူ လက်ရှိ ရှင်သန်ရသည့် ဘဝဇာတ်လမ်းမှာ ပါဝင်ကြသည့် သရုပ်ဆောင်များဖြစ်သော ကျွနု်ပ်တို့ညီအစ်ကိုမောင်နှများနှင့် အခြား ဇာတ်ရုပ် စရိုက်များကိုလည်း လေ့လာ သိရှိလာနိုင်သည်။ လောကဇာတ်ခုံပေါ်မှာ မည်သူကမျှ လူပိုကြီး မဟုတ်ပါ။ လူတိုင်း၏ ဇာတ်လမ်းသည် အလားလာရှိသော ပြောင်းလဲမှုများကို ဖော်ဆောင်နိုင်သည်။ မကောင်းသည့်အရာ ပြောနေရင်တောင် မကောင်းမှုအလယ်က ကောင်းကွက် တစ်ခုအတွက် နေရာရှိသေးသည်။ ကောင်းမြတ်သည့်အရာများ ရှိနေသေးသည်ကို သတိပြု၍ အကောင်းအတွက်လည်း နေရာပေးရန် လိုသည်။

ထို့အတွက်ကြောင့် ကျွနု်ပ်တို့ဘဝဇာတ်လမ်းများကို ပြောခြင်းသည် သာမန်ပုံပြင်ပြောခြင်းမျိုးမဟုတ်ပါ။ ကြော်ငြာ နေခြင်းလည်း မဟုတ်ပေ။ ဘုရားသခင်ရှေ့၌ ကျွနု်ပ်တို့က ဘာလဲ၊ ဘယ်သူလဲ ဆိုသည်က ပို၍ အရေးကြီးသည်။ နှလုံးသားထဲ၌ သန့်ရှင်းသော ၀ိညာဉ်တော်ဘုရား ရေးသားထားသည့် ဘုရားသခင်နှင့် လူသားဆက်နွယ် ပတ်သက်မှုကို သက်သေခံရန်မှာ ပို၍ ပဓါနကျပေသည်။ ထိုသို့ပြုလုပ်နိုင်ရန် ဘုရားသခင်နှင့် လူ့ဇာတ်လမ်းကို ကောင်းစွာ စပ်ယှက် ပေးနိုင်ခဲ့သည့် အမိမယ်တော်ကို အားကိုးအပ်နှံရပေမည်။ "မာရီယားသည် မိမိ၏ စိတ်နှလုံး၌ သိမ်းထားကာ ဆင်ခြင်နှလုံးသွင်းလေ၏" (လုကာ ၂ း ၁၉) ဟု ရေးသားထားသည်။ သိမ်မွေ့သော မေတ္တာအင်အားနှင့် ဘဝအဖြစ်အပျက် များကို ဆက်နွယ်ရှင်သန်တတ်သော အမိမယ်တော်ထံမှာ အကူညီတောင်းခံကြပါစို့။

အို အမိမယ်တော် မာရီယား၊ သခင်မသည် ဝမ်းတွင်း၌ပင် ဘုရားသခင်၏ နှုတ်ကပါဌ်တော်ကို စပ်ယှက်ဖြစ်တည် စေခဲ့သည်။ ဘုရားသခင် ပြုလုပ်သော အမှုအရာများကို ချီးမွမ်းသံစဉ်ကျူးခဲ့ပေသည်။ ကျွနု်ပ်တို့၏ ဘဝအဖြစ်အပျက်များကို နားထောင်ပေးပါ။ သခင်မ၏ နှလုံးသားထဲ၌ သိမ်းဆည်းကာ မည်သူမျှ မကြားချင်သည့် ဘဝအဖြစ်အပျက်များကို သခင်မ၏ ဘဝကဲ့သို့ ပြုတော်မူပါ။ ဘဝသမိုင်းတစ်လျှောက် ဖြစ်ပျက်သမျှ အကောင်းဟူသမျှကို အသိမှတ်ပြုနိုင်ရန် သင်ကြားပေးပါ။ ကျွနု်ပ်တို့၏ စိတ်ဝိညာဉ်ကို ရိုက်ချိုးစေသည့် ဘဝအပြောင်းအလဲများကိုလည်း ကြည့်တော်မူပါ။ သခင်မ၏ နှုးညံ့သော လက်များဖြင့် ပြန်လည်ဖြေသိမ့်ပေး၍ ရှင်သန်စေပါ။ ငြိမ်းချမ်းရေးကို တည်ဆောက်ပေးသည့် ဘဝဇာတ်လမ်း များ၊ အနာဂတ်ကို ဖော်ဆောင်နိုင်သည့် ဘဝသမိုင်းများကို ရေးထိုးနိုင်ရန် ကူညီပေးတော်မူပါ။ ထိုအရာများကို အတူတကွ ပေါင်းစပ် ရှင်သန်တတ်ရန် ကျွနု်ပ်တို့အား ကူညီပေးပါ။

ပုပ်ရဟန်းမင်းကြီး ဖရန်စစ် အရှင်သူမြတ်

ရောမမြို့၊ စိန့်ဂျွန် လက်သရင်းဘုရားကျောင်း၊

၂၄ ၊ ဇန်နဝါရီလ၊ ၂၀၂၀ ၊ ရှင်ဖရန်စစ် ဒီဆေးပွဲနေ့

သီကိုရှင်း (ဆီလျော်အောင် ဘာသာပြန်ဆိုသည်)