ခရစ္စမတ်စ်သစ်ပင်နှင့် ဖွားမြင်တော်မူခြင်းမြင်ကွင်းတို့သည် ခရစ္စမတ်စ်အငွေ့အသက်ကို ခံစားရစေသည်

ခရစ္စမတ်စ်သစ်ပင်နှင့် ဖွားမြင်တော်မူခြင်းမြင်ကွင်းတို့သည် ခရစ္စမတ်စ်အငွေ့အသက်ကို ခံစားရစေသည်

 

ရဟန်းမင်းကြီးဖရန်စစ်အရှင်သူမြတ်သည် ခရစ္စမတ်စ်သစ်ပင်နှင့် သခင်ယေဇူးဖွားမြင်တော်မူခြင်း ဆင်းထုတော်များကို ကောင်းချီးပေးဖွင့်လှစ်စဉ်တွင် စိန့်ပီတာရင်ပြင်၌ရှိနေသူများအား နှုတ်ခွန်းဆက်သရင်း ကျေးဇူးတင်စကားမြွက်ကြားခဲ့သည်။

ချစ်လှစွာသော ညီအစ်ကိုမောင်နှမအပေါင်းတို့

“ခရစ္စမတ်စ်သစ်ပင်နဲ့ သခင်ယေဇူးဖွားမြင်တော်မူခြင်းမြင်ကွင်းကို တရားဝင်ခင်းကျင်းပြသခြင်းအတွက် စိန့်ပီတာရင်ပြင်မှာရောက်ရှိလာကြတဲ့ သင်တို့အားလုံးကို နွေးထွေးစွာကြိုဆိုပါတယ်၊ အခုလို ရောက်လာတဲ့အတွက်လည်း ကျေးဇူးတင်ပါတယ်။ နိုင်ငံခြားရေးဝန်ကြီးဦးဆောင်တဲ့ ဆလိုဗေးနီးယားသမ္မတနိုင်ငံမှ ကာဒီနယ် Rodé၊ Maribor ဂိုဏ်းချုပ်ဆရာတော်ကြီးနှင့်အတူ အခြားဝန်ကြီးများ၊ သံအမတ်ကြီးများနဲ့ ကြွရောက်လာကြတဲ့အထူးဧည့်သည်တော်များကို နှုတ်ခွန်းဆက်သလိုက်ပါတယ်။ ဆလိုဗေးနီးယားနိုင်ငံက ဤခမ်းနားထည်ဝါလှတဲ့ အနီရောင်ထင်းရှူး ပင်ကို Kočevje သစ်တောထဲကရွေးချယ်ပြီး လှူဒါန်းခဲ့တာဖြစ်ပါတယ်။ Teramo-Atri ဂိုဏ်းအုပ်ဆရာတော်ကြီး Lorenzo Leuzzi နဲ့အတူ အရပ်ဘက်အာဏာပိုင်များကိုလည်း ကျွန်ုပ် နှုတ်ခွန်းဆက်သလိုက်ပါတယ်။ ဒီသစ်ပင်နဲ့ ဖွားမြင်တော်မူခြင်းမြင်ကွင်းကို ပြသထားခြင်းက ကယ်တင်ရှင်ရဲ့ လူ့ဇာတိအဖြစ်ကိုယူတော်မူခြင်းဆိုတဲ့ နက်နဲရာအချက်ကို ယုံကြည်ပြီး အသက်ရှင်နေထိုင်နိုင်ဖို့အတွက် အထောက်အကူပြုတယ်။ လူ့ဇာတိကိုယူတော်မူခြင်းမှာ အရာရာတိုင်းက ကျွန်ုပ်တို့ကို “ကောင်းသော” ဆင်းရဲနွမ်းပါးခြင်းနဲ့ ဧဝံဂေလိဆိုင်ရာ ဆင်းရဲခြင်းအကြောင်း ပြောထားတယ်။ ဒါကကျွန်ုပ်တို့ကို မင်္ဂလာရှိသောသူများ ဖြစ်စေတယ်။ သန့်ရှင်းသောအိမ်ထောင်စုကိုထောက်ရှုဆင်ခြင်ကြမယ်ဆိုရင် သူတို့ရဲ့ချစ်စရာကောင်းတဲ့နှိမ့်ချခြင်းက ကျွန်ုပ်တို့ကိုဆွဲဆောင်တယ်။ မယ်တော်သခင်မနဲ့ စိန့်ဂျိုးဇက်တို့က ဘက်သလေဟင်မြို့ကနေ နာဇရက်မြို့ကိုရောက်လာတဲ့အခါ သူတို့အတွက်တည်းခိုစရာနေရာဆိုလို့ အခန်းငယ်လေးတစ်ခုတောင် မရှိခဲ့ဘူး။ (လုကာ ၂း၇) မာရိယာမူကား ဤအကြောင်းအရာအလုံးစုံတို့ကို မိမိ၏စိတ်နှလုံးတွင် စဉ်းစားဆင်ခြင်လျက် သိမ်းထားလေ၏။ (လုကာ ၂ း ၁၉၊ ၅၁ )

ဂျိုးဇက်က မယ်တော်နဲ့မွေးဖွားလာမယ့်ကလေးငယ်အတွက် သင့်တော်တဲ့နေရာကိုရှာဖွေနေခဲ့တယ်။ ဧဝံဂေလိကျမ်းစာထဲကအတိုင်း သိုးထိန်းလေးတွေက အဓိကဖြစ်တယ်။ သူတို့က ကွင်းပြင်မှာ နေကြတယ်။ သူတို့ရဲ့သိုးလေးတွေကို စောင့်ကြည့်နေကြတယ်။ ကောင်းကင်တမန်တွေရဲ့ ကြွေးကြော်သံက သူတို့အတွက်ဖြစ်ပြီး သူတို့လည်း မွေးဖွားလာတဲ့ကယ်တင်ရှင်ကို ချက်ချင်းလိုက်ရှာခဲ့ကြတယ်။ (လုကာ ၂ း ၈-၁၆ )

ခရစ္စမတ်စ်ပွဲတော်က သခင်ယေဇူးသည် ကျွန်ုပ်တို့၏ငြိမ်သက်ခြင်း၊ ဝမ်းမြောက်ခြင်း၊ ခွန်အားနဲ့ နှစ်သိမ့်ခြင်းဖြစ်ကြောင်း သတိပေးတယ်။ ဒါပေမဲ့ ဒီကျေးဇူးတော်လက်ဆောင်တွေကို ရယူနိုင်ဖို့အတွက် ဆင်းရဲခြင်းနဲ့ နှိမ့်ချခြင်းရှိဖို့တော့ လိုအပ်တယ်။ ဒီနှစ်ခရစ္စမတ်စ်ဟာ ရောဂါပျံ့နှံ့မှုနဲ့ဆင်းရဲဒုက္ခတွေကြားမှာ အကူအညီမဲ့နေတဲ့ မွေးကင်းစ သူငယ်တော်ယေဇူးလေးလိုပဲ ကမ္ဘာကိုဘုရားသခင်ပေးသနားတဲ့ “အမှတ်လက္ခဏာ” ဖြစ်တယ်။ (လုကာ ၂း၁၂) Greccio မြို့မှာ ပြီးခဲ့တဲ့နှစ်က ကျွန်ုပ်လက်မှတ်ရေးထိုးခဲ့တဲ့စာထဲက “An enchanting image” ကို ဒီလိုအချိန်မှာ ပြန်လည်ဖတ်ရှုဖြစ်ကြရင် ကျွန်ုပ်တို့အတွက် ပိုကောင်းပါလိမ့်မယ်။

မိတ်ဆွေအပေါင်းတို့၊ ဒီနေရာမှာရှိနေကြတဲ့ သင်တို့ကိုသော်လည်းကောင်း၊ အကြောင်းအမျိုးမျိုးကြောင့် ဒီအခမ်းအနားကို မတက်ရောက်နိုင်ကြသူများကိုသော်လည်းကောင်း၊ ဒီသစ်ပင်နဲ့ ဆင်းထုတော်တွေကို သယ်ယူပို့ဆောင်ရေး/ အလှဆင်ရေးမှာ ပါဝင်အင်အားဖြည့်ခဲ့ကြသူများ အားလုံးကို လှိုက်လှိုက်လှဲလှဲ ကျေးဇူးတင်ပါတယ်။ သင်တို့ရဲ့အဆင်သင့်ရှိမှုနဲ့ ရက်ရောမှုတွေအတွက် ဘုရားသခင်သည် ဆုကျေးဇူးများစွာကို သင်တို့အပေါ်မှာ ပြန်လည်သွန်းလောင်းပေးတော်မူပါစေ။ မျှော်လင့်ချက်အပြည့်နဲ့ ခရစ္စမတ်စ်ပွဲကျင်းပနိုင်ကြဖို့ ဆုမွန်ကောင်းတောင်းပေးလိုက်ပါတယ်။ သင်တို့ရဲ့မိသားစုဝင်တွေနဲ့ သင်တို့ရဲ့နိုင်ငံသားအားလုံးဆီကိုလည်း ဆုမွန်ကောင်းတွေ ယူဆောင်သွားပေးပါ။ သင်တို့ကို ကျွန်ုပ် ကောင်းချီးပေးလိုက်ပါတယ်။ သင်တို့အတွက် ကျွန်ုပ်ဆုတောင်းပေးနေမယ်ဆိုတာကို အာမခံပါတယ်။ ကျွန်ုပ်အတွက်လည်း ဆုတောင်းပေးဖို့ မမေ့ကြပါနဲ့။ ပျော်ရွှင်သောခရစ္စမတ်ဖြစ်ပါစေ! ကျေးဇူးတင်ပါတယ်။”

Translated by CBCM OSC

Source: Vatican News

 

Add new comment

3 + 1 =