Homily For Christmas 2020

Homily For Christmas 2020

His Eminence Charles Cardinal Bo

သခင်ခရစ်တော်၌ချစ်ခင်ရတဲ့ ညီအစ်ကိုမောင်နှမအပေါင်းတို့ “Merry Christmas” လို့နှုတ်ခွန်းဆက်သပါတယ်။ ခရစ္စမတ်ညမှာပျော်ရွှင်ဝမ်းမြောက်ကြပါစေ။ မျှော်လင့်ခြင်းဟာလည်း နှစ်သစ်ရောင်ခြည်လို ပေါ်ထွန်းထွက်လာပါစေ။ သင်တို့အားလုံး ဘုရားသခင်ရဲ့ကောင်းကြီးမင်္ဂလာအပေါင်းခံစားရပါစေ။ ဒီညဟာ ဘုရားသခင်ရဲ့ကတိတော်ပြည့်ဝရာ ထူးမြတ်တဲ့ညဖြစ်ပါတယ်။ နောက်ဆုံးမှာတော့ ဒီညဟာနှစ်သစ်အဖြစ်ကိုပြောင်းသွားပါလိမ့်မယ်။ ဒါဟာကျွန်တော်တို့ရင်ဆိုင်တွေ့နေရတဲ့ ရှေ့အလားအလာကို ထင်ဟပ်ပြသနေသလိုပါပဲ။ ၂၀၂၀ပြည့်နှစ်ဟာ ကျွန်ုပ်တို့အတွက်ကြီးမားတဲ့ စိန်ခေါ်မှုတွေ အများအပြားယူဆောင်လာခဲ့ပါတယ်။ မဆုံးနိုင်တော့တဲ့ဆောင်းတွင်း၊ မိုးမလင်းတော့တဲ့ည လို့တောင်မှ ခံစားရပါတယ်။ ဒါပေမဲ့ ဒီနေ့ဖတ်ရှုခဲ့တဲ့ ပထမကျမ်းမှာ ပရောဖက်အီဇာအီယဟာ “မှောင်မိုက်ထဲမှာသွားလာသောသူများတို့သည် ကြီးစွာသောအလင်းကို မြင်ရပြီ။” လို့ဟောထားခဲ့ပါတယ်။

အခုနှစ်ကုန်ပိုင်းရောက်လာတဲ့အချိန်မှာ ကြောက်မယ်ဖွယ် ကိုရိုနာဗိုင်းရပ်စ်ကို ကာကွယ်ပေးမဲ့ဆေးတွေ ပေါ်လာတဲ့သတင်းကြောင့် ကျွန်ုပ်တို့အားတက်ကြတယ်။ ဘုရားသခင်ဟာ ဘယ်တော့မှလူသားတွေကိုပစ်မထားပါဘူး။ ဒါဟာဒီနှစ်တစ်လျှောက်လုံး အပြင်းအထန်ရုန်းကန်ခဲ့ရတဲ့ ကျွန်ုပ်တို့အတွက် ခရစ္စမတ်သတင်းစကားဖြစ်ပါတယ်။ ဘုရားသခင်ဟာ အေးချမ်းသာယာနေတဲ့အချိန်မှာ ကြွလာခြင်းမဟုတ်ဘဲနဲ့ မျှော်လင့်ချက်ကုန်ဆုံးတဲ့အချိန်မျိုးမှသာ ကြွလာခြင်းဖြစ်ပါတယ်။ ဘာဖြစ်လို့လဲဆိုတော့ ဘုရားသခင်ဟာ မျှော်လင့်ခြင်းရဲ့အရှင်နဲ့ အသက်ရဲ့သခင်ဖြစ်ပါတယ်။ ခရစ္စမတ်ကပေးတဲ့ သတင်းစကားဟာ အမြဲမပြတ် စီးဆင်းနေတဲ့မျှော်လင့်ခြင်းပဲဖြစ်ပါတယ်။ ခရစ်တော်ဟာလဲပဲ အမှောင်ထုရှိသမျှကို ဖြိုခွင်းမဲ့အလင်းရှင်ဖြစ်ပါတယ်။ ရှေ့လာမဲ့နှစ်ဟာ ငြိမ်းချမ်းတဲ့နှစ်ဖြစ်ဖို့၊ မြန်မာပြည်သူပြည်သားတွေလည်းပဲ ကျန်းမာချမ်းသာကြဖို့၊ ကျွန်ုပ်တို့ဆုတောင်းကြပါတယ်။ ကျွန်ုပ်တို့ရဲ့မျှော်လင့်ချက်ကြီးဟာ ဧရာဝတီမြစ်ကြီးလိုပဲ ကျွန်ုပ်တို့ရဲ့နှလုံးသားထဲမှာ အမြဲတန်းစီးဆင်းနေပါတယ်။

ပထမဆုံးသော ခရစ္စမတ်ညအဖြစ်အပျက်ကို ကျွန်ုပ်တို့အားလုံးသိကြပြီ။ ကြားရတဲ့ သမ္မာကျမ်းစာထဲမှာလည်း သန့်ရှင်းတဲ့အိမ်ထောင်စုဟာ ကျွန်ုပ်တို့အိမ်ထောင်စုလိုပဲ အခက်အခဲပေါင်းစုံကို ရင်ဆိုင်ကျော်ဖြတ်ခဲ့ရတယ်။ သူတို့လည်းပဲ ဆင်းရဲတယ်။ ပုံမှန်အလုပ်အကိုင်မရှိဘူး။ ကျွန်ုပ်တို့ရဲ့လူငယ်တွေ တိုင်းတပါးမှာ အလုပ်လုပ်ရသူတွေလည်းပဲ ရုန်းကုန်နေရတယ်။ မွေးဖွားလာတဲ့သူငယ်တော်ကလေးကို ထားဖို့ အိမ်ကလေးတစ်လုံးတောင်မှ မဝယ်နိုင်ခဲ့ဘူး။ ကျမ်းစာထဲမှာ သူတို့အဖို့နေစရာမရှိလို့ ကျွန်ုပ်တို့ကြားခဲ့ရတယ်။ အိမ်နီးနားချင်းနိုင်ငံတွေမှာ သွားရောက်လုပ်ကိုင်နေကြတဲ့ ကျွန်ုပ်တို့ရဲ့နိုင်ငံသား ထောင်ပေါင်းများစွာအဖို့လည်းပဲ နေစရာနေရာမရှိပါဘူး။ ဒါပေမဲ့ အမှောင်ထုထဲကနေပြီးတော့ အလင်း ပေါ်ထွက်လာခဲ့ပါတယ်။ ဒီအလင်းဟာ တစ်ညတည်းအတွက် ထွက်လာတာမဟုတ်ဘဲနဲ့ လွန်ခဲ့တဲ့နှစ်၂၀၀၀ ကျော်လုံးလုံးထွန်းလင်းနေခဲ့ပါတယ်။ ဒါကြောင့်အမှောင်ထုကို ကြိမ်ဆဲနေမဲ့အစား၊ မျှော်လင့်ခြင်းမီးတွေကို ထွန်းညှိလိုက်ပါ။ ဒါဟာခရစ္စမတ်ရဲ့သတင်းစကားလည်းပဲဖြစ်ပါတယ်။ မျှော်လင့်ခြင်းမီးအိမ်ကို ကျွန်ုပ်တို့ရဲ့နှလုံးသားထဲမှာ၊ ကျွန်ုပ်တို့ရဲ့မိသားစုထဲမှာ၊ ကျွန်ုပ်တို့ရဲ့မြန်မာနိုင်ငံမှာ ထွန်းညှိရပါလိမ့်မယ်။ ဘာဖြစ်လို့လဲဆိုတော့ လူဆိုတာ မျှော်လင့်ချက်နဲ့အသက်ရှင်ရတဲ့အတွက်ကြောင့်မို့ဖြစ်ပါတယ်။

ပြီးခဲ့တဲ့နှစ်က ခရစ်မတ်မှာ ရဟန်းမင်းကြီးအရှင်သူတော်မြတ်က ဒီအမှောင်ထုတွေအကြောင်းကို ဟောခဲ့ပါတယ်။ ကျွန်ုပ်တို့ရဲ့ကိုယ်ပိုင်ဘဝ၊ မိသားစုရဲ့ဘဝနဲ့ လူမှုဆက်ဆံရေးဘဝတွေမှာ အမှောင်ထုတွေရှိနေပါတယ်။ ဒါပေမဲ့ခရစ်တော်ရဲ့အလင်းဟာ အမှောင်ထုအားလုံးကို ဖြိုခွင်းနိုင်ပါတယ်။ ဒီနှစ်ခရစ္စမတ်မှာတော့ ကိုရိုနာဗိုင်းရပ်စ်ရောဂါ ဖိစီးတဲ့ကြားထဲမှာ ကျွန်ုပ်တို့ပြန်လည်ရှင်သန် နိုးကြားတဲ့အရိပ်အရောင်တွေ တွေ့နေရပါတယ်။ ယေဇူးဘုရားရှင်လူ့ဇာတိအဖြစ်ကို ယူတော်မူခြင်းဟာ လူသားနဲ့ဖန်ဆင်းခံရတဲ့သတ္တဝါတွေအပေါ် ဘုရားသခင်ရဲ့အမှန်တကယ် ချစ်ခင်မြတ်နိုးကြောင်း၊ သက်သေပြနေပါတယ်။ ကျွန်ုပ်တို့မှာ အရာရာဆုံးရှုံးသွားတဲ့အခါ ဘုရားသခင်ဟာ ကျွန်ုပ်တို့ကိုပြန်လည်ရွေးနှုတ်ကယ်တင်နေပါတယ်။ ကယ်တင်ခြင်းခံစားရတယ်ဆိုတာ အခိုင်အမာယုံကြည်တဲ့စိတ်မျိုး၊ ခရစ္စမတ်က ဆောင်ကျဉ်းပေးပါစေ။ ၂၀၂၀ပြည့်နှစ်လို ဆုံးရှုံးမှုကြီးမားတဲ့ အချိန်မှာ ဒီလိုယုံကြည်စိတ်မျိုးထားဖို့ဆိုတာ ဘယ်လိုလုပ်ပြီးတော့ဖြစ်နိုင်မှာလဲ။ ဘုရားသခင်အတွက် မဖြစ်နိုင်တဲ့အရာဆိုတာမရှိပါဘူး။ ယုံကြည်ခြင်းသာရှိပါစေ။ လွန်ခဲ့တဲ့နှစ် ၂၀၀၀ ကျော်ဆီက မယ်တော်မာရီးယားဆီကို ကောင်းကင်တမန် ဂါဗြီအဲလ်က အမိန့်တော်ပြန်တုန်းက ဘုရားသခင်က သူမကို ကယ်တင်ရှင်မိခင်ဖြစ်ဖို့ ရွေးကောက်ထားကြောင်းမိန့်ကြားတဲ့အခါမှာ မယ်တော်ဟာဒီမေးခွန်းပဲမေးတယ်။ ကျွန်မဟာကညာစင်ဖြစ်တဲ့အတွက် ဒါဟာဘယ်လိုဖြစ်နိုင်မလဲလို့ မယ်တော်ကမေးတော့ ကောင်းကင်တမန်ဂါဗြီအဲက ဘုရားသခင်အဖို့မဖြစ်နိုင်တာမရှိဘူး။ အသက်အရွယ်ကြီးရင့်နေပြီဖြစ်တဲ့ ဧလိဇဘက်တောင်မှ ဘုရားရဲ့ကျေးဇူးတော်ကြောင့်မို့ ပဋိသန္ဓေစွဲနေပါပြီလို့ ပြောကြားခဲ့တယ်။

၂၀၂၀ ပြည့်နှစ်ဟာ ကိုဗစ်ဆိုတဲ့ Year C နှစ်ဖြစ်ပါတယ်။ ဒါပေမဲ့ Compassion လို့ခေါ်တဲ့ Year C ရဲ့နှစ်လည်းပဲဖြစ်တယ်။ ဒီကိုရိုနာဗိုင်းရပ်စ်ဟာ ကျွန်ုပ်တို့ရဲ့ ခန္ဓာပိုင်း၊ စိတ်ပိုင်း၊ လူမှုရေးရာနဲ့ ဝိညာဉ်ရေးအပိုင်းတွေမှာ အားလုံးအပေါ်မှာ သက်ရောက်မှုကြီးမားပါတယ်။ သူ့သက်ရောက်မှုကြောင့်မို့ နောက်ထပ် C တစ်ခုဖြစ်တဲ့ ခရစ္စမတ်ကိုပါခြိမ်းခြောက်နေပါတယ်။ ကျွန်ုပ်တို့ မစ္ဆားတရားနာတဲ့အခါမှာ လူသုံးဆယ်ပဲ ကန့်သတ်ထားပြီးတော့ ၃၀၀၀ အစား ၃၀ ပဲ လာကြရပါတယ်။ ဒါပေမဲ့ အဲ့လိုပဲခရစ္စမတ်နဲ့ဆိုင်တဲ့ တစ်ခြား C တွေဖြစ်တဲ့ ခရစ်ပ်တို့ ကယ်ရော်စ်တို့ ကိတ်စ်တို့ ကွန်ဂရီကေးရှင်းနော် ဝေါရှစ်ပ်တို့၊ ချပ်ရှ်တို့ စတာတွေအားလုံးဟာလည်း သက်ရောက်မှုရှိပါတယ်။ ပြန်စဉ်းစားလိုက်တဲ့အခါမှာ Merry Christmas အစား Worry Christmas လို့တောင်မှ ပြောရမလိုတောင်ဖြစ်နေပါတယ်။ ဒါပေမဲ့ ဒီအရာတွေကြောင့်ပဲ အရေးအကြီးဆုံး C ဖြစ်တဲ့ ခရစ်တော်က သနားကြင်နာခြင်း Compassion နဲ့ ကြွလာခြင်းနဲ့ ကျွန်ုပ်တို့အားလုံးကို ကောင်းကြီးပေးပါတယ်။ တကယ်တော့ ကပ်ရောဂါကြောင့်ပဲ ခရစ်မတ်ဟာ ပိုပြီးတော့တောင် အဓိပ္ပါယ်ရှိလာတယ်။ ခရစ်တော်ဘုရားရှင်ဟာ ကျွန်ုပ်တို့ကို တစ်နှစ်ပတ်လုံး အဖော်ပြုပေးပြီးတဲ့နောက် အလုပ်အကိုင်ဆုံးရှုံးသွားတဲ့လူတွေ၊ ရောဂါပိုးကူးစက်ရတဲ့ မိသားစုတွေ၊ ချစ်ခင်သူတွေဆုံးရှုံးရတဲ့ မိသားစုတွေကို နှစ်သိမ့်ခြင်းပေးပါတယ်။ ကျွန်ုပ်တို့ကိုလည်း “မစိုးရိမ်နဲ့ ငါသည်သင့်ဘက်မှာရှိတယ်။ မကြောက်နဲ့။ သင်၏ဘုရားသခင်ငါသည် သင့်ကိုခိုင်ခံ့စေမည်။ သင့်ကိုစောင်မမည်။ ငါ၏သစ္စာလက်ျာလက်ဖြင့် ထောက်ပင့်မည်။” လို့ ဟေရှာယ (၄၁း၁၀) မှာမိန့်ကြားခဲ့ပါတယ်။

ဒီနေ့ခရစ္စမတ်မှာ နွားစားခွက်ထဲက သူငယ်တော်ယေဇူးကို သွားရောက်နှုတ်မဆက်နိုင်ပေမဲ့ ကျွန်ုပ်တို့နဲ့အတူ ခရစ်တော်ဟာ အမြဲပဲရှိနေတယ်ဆိတာ သတိထားဖို့လိုပါတယ်။ လူ့ဇာတိအဖြစ်ကို ယူတော်မူတဲ့ကိုယ်တော်ရှင်ဟာ ကျွန်ုပ်တို့ရဲ့လိုအပ်ချက်တွေအားလုံးကို သိမြင်တော်မူတဲ့အတွက် ဖိလိပ္ပိဩဝါဒမှာ ရှင်ပေါလုဆုံးမခဲ့တဲ့အတိုင်းပဲ “အဘယ်အမှုကိုမျှ စိုးရိမ်ခြင်းမရှိပဲ အရာရာ၌ကျေးဇူးတော်ကို ချီးမွမ်းခြင်းနှင့်တကွ၊ ဆုတောင်းပဌနာပြုခြင်းအားဖြင့် သင်တောင်းပန်လိုသောအရာများတို့ကို ဘုရားသခင်အားကြားလျှောက်လော့။” လို့ ကျွန်ုပ်တို့ရဲ့နှလုံးထဲမှာ သွင်းထားစေလိုပါတယ်။ အခုဆိုရင် ဘုရားသခင်ရဲ့အံ့ဖွယ်ကျေးဇူးတော်ကြောင့်မို့ တစ်နှစ်လုံးအတွင်းမှာပဲ ကာကွယ်ဆေးထွက်လာခဲ့ပြီ။ ရောဂါကို တိုက်ထုတ်နိုင်ပါတော့မယ်။ အလင်းရှင်ဖွားမြင်တော်မူတဲ့ ခရစ္စမတ်ညမှာ အမှောင်ကမ္ဘာကို အပြီးတိုင်အောင်၊ အောင်နိုင်ပါလိမ့်မယ်။ ဒါနဲ့ပတ်သက်လို့ ရှင်ယောဟန်ကလည်းပဲ “ကိုယ်တော်၌အသက်တည်ရှိ၍၊ အသက်သည်လူတို့၏အလင်းဖြစ်၏။ အလင်းသည် မှောင်မိုက်တွင်ထွန်းလင်း၏။ မှောင်မိုက်မူကားအလင်းကို မလွမ်းမိုးနိုင်ချေ။”

စစ်ပွဲတွေ ပဋိပက္ခတွေဟာ ကြာရှည်စွာဖြစ်ပွါးနေတဲ့ ကပ်ဘေးတွေဖြစ်ပြီးတဲ့နောက် ငြိမ်းချမ်းခြင်းရဲ့အရှင် ယေဇူးခရစ်တော်ဟာ ကျွန်ုပ်တို့ကို ကုသပေးပါလိမ့်မယ်။ ဗိုင်းရပ်စ်ကြောင့်မို့ မိသားစုအားလုံး ပူပန်သောကရောက်ကြတယ်။ ဗိုင်းရပ်စ်ဟာ ချမ်းသာတဲ့နိုင်ငံတွေကိုတောင် အလွတ်မပေးဘဲနဲ့ အားလုံးနီးပါးကို ကူးစက်ပျံ့ပွါးခဲ့တဲ့အတွက် လူ့သမိုင်းကြောင်းထဲမှာ အဆိုးဝါးဆုံးကပ်ရောဂါတွေထဲမှာ တစ်ခုဖြစ်ပါတယ်။ ကိုရိုနာရဲ့ ရိုက်ခတ်မှုနဲ့အတူ တစ်ခြားဘေးတွေဖြစ်တဲ့ ဆင်းရဲခြင်းဘေး၊ စစ်ဘေး၊ နေရပ်စွန့်ခွါထွက်ပြေးရတဲ့ဘေး၊ လူကုန်ကူးခံရတဲ့ဘေး၊ ခေါင်းထောင်လာကြတယ်။ အချိန်တန်ရင် ဗိုင်းရပ်စ်က ပျောက်ကွယ်သွားပါလိမ့်မယ်။ ဒါပေမဲ့ ကျွန်တော်တို့ရဲ့နိုင်ငံမှာ ဖြစ်နေတဲ့စစ်ဘေးကတော့ နှစ်ပေါင်း (၇၀)တောင်ရှိလာပေမဲ့ ငြိမ်းချမ်းရေးမရသေးပါဘူး။ ကော်ရော်နာဗိုင်းရပ်ဖြစ်စဉ်က ပုပ်ရဟန်းမင်းကြီးနဲ့ ကမ္ဘာ့ကုလသမ္မဂ္ဂအတွင်းရေးမှူးချုပ်တို့နဲ့ ထုတ်ပြန်ချက်အတိုင်းပဲ ကျွန်ုပ်တို့ဟာလည်းပဲ စစ်ပွဲတွေရပ်ဖို့၊ ငြိမ်းချမ်းရေးဖော်ဆောင်ဖို့ သဘောထားကြေညာချက်ကို ထုတ်ပြန်ခဲ့ပါတယ်။ ကိုဗစ်ဟာ လူနည်းစု၊ လူများစု ဘာသာအဆင့်အတန်းမခွဲခြားပဲနဲ့ ကူးစက်ပျံ့ပွားခဲ့တဲ့အတွက် ကျွန်ုပ်တို့လူသားများအားလုံးဟာ တန်းတူပဲဆိုတာကို သက်သေပြခဲ့ပါတယ်။

ပြည်တွင်းစစ်ဘေးဒဏ်ခံနေရတဲ့မြန်မာနိုင်ငံအတွက် ခရစ်တော်ဟာ ငြိမ်းချမ်းရေးအရှင်အဖြစ်ကြွလာပါတယ်။ ဒီအကြောင်းနဲ့ပတ်သက်လို့ ပရောဖက်အီဇာအီယက “အကြောင်းမူကား ငါတို့အဖို့ သူငယ်တော်ဖွားမြင်ပြီ။ ငါတို့အားသားကို သနားတော်မူသည်။ ထိုသူသည် အုပ်စိုးခြင်းအာဏာစက်ရှိလိမ့်မည်။ နာမတော်ကားအံ့ဩဖွယ်၊ တိုင်ပင်ဖက်၊ တန်ခိုးကြီးသောဘုရားသခင်၊ ထာဝရအဖ၊ ငြိမ်သက်ခြင်းအရှင်လို့ ခေါ်ဝေါ်သမုတ်ခြင်းကိုခံရလိမ့်မည်။”

ဒီကနေ့ဖတ်ကြားခဲ့တဲ့ ဧဝံဂေလိကျမ်းမှာလည်းပဲ ကောင်းကင်တမန်တော်တွေက “အမြင့်ဆုံးသောအရပ်၌ ဘုရားသခင်အား ဘုန်းတော်ဂုဏ်တော်ရှိစေသတည်း။ မြေကြီးပေါ်၌လည်း ဘုရားသခင်နှစ်သက်မြတ်နိုးသောသူတို့အား ငြိမ်းချမ်းခြင်းရှိစေသတည်း။” လို့သီချင်းဆိုခဲ့တယ်။ ကျွန်ုပ်တို့ကို စိတ်ကောင်းနှလုံးကောင်းရှိဖို့ခရစ္စမတ်က နှိုးဆော်နေပါတယ်။ ဘာအတွက် ကျွန်ုပ်တို့ဘာလုပ်ရမလဲ။

နောက်ဆုံးအနေနဲ့ပြောချင်တာက ကျွန်ုပ်တို့စိတ်နှလုံးတွေပြင်ဆင်ပြီးတဲ့နောက် တိုင်းရင်းသားအားလုံးငြိမ်းချမ်းစွာနဲ့ နေထိုင်ကြရပါမယ်။ သယံဇာတတွေကို လက်ဝါးကြီးမအုပ်ဘဲနဲ့ အားလုံးညီတူမျှတူ အကျိုးခံစားရဖို့လိုပါတယ်။ ဩဇာအာဏာရှိတဲ့သူတွေဟာ နိမ့်ကျတဲ့သူတွေ စွမ်းဆောင်ရည်မြင့်လာအောင် လုပ်ပေးရပါမယ်။ လူငယ်တွေကို ဖျက်စီးနေတဲ့ မူးရစ်ဆေးဝါးစျေးကွက်ကြီးတစ်ခုလုံးကို ဖျက်စီးရပါမယ်။ လက်နက်ကိုင်အဖွဲ့အစည်းတွေလည်းပဲ တိုက်ပွဲတွေရပ်တန့်ပြီးတဲ့နောက် ငြိမ်းချမ်းရေးဆွေးနွေးရပါမယ်။ စီးပွါးရေးနဲ့၊ သဘာဝပတ်ဝန်းကျင်ဖွံ့ဖြိုးတိုးတက်ပြီး ရွှေနိုင်ငံတော်ကို တည်ဆောက်ရပါလိမ့်မယ်။ လူမျိုးဘာသာ၊ မခွဲခြားဘဲနဲ့ အားလုံးကို ညီအစ်ကိုမောင်နှမတွေလို ပေါင်းသင်းဆက်ဆံရပါမယ်။ ခရစ္စမတ်ပွဲတော်ပြီးတာနဲ့ ခရစ္စမတ်ရဲ့ကောင်းကြီးမင်္ဂလာတွေဟာ လှုပ်ရှားအသက်ဝင်နေပါပြီ။ ကျွန်ုပ်တို့အားလုံးလဲ စိတ်ကောင်းနှလုံးကောင်းနဲ့ပြည့်ဝကြပါစေ။ မြန်မာနိုင်ငံသားအားလုံးလည်း တအူတုံဆင်းမောင်နှမရင်းချာတွေလို အတူတကွလက်တွဲရင်းနဲ့ ငြိမ်းချမ်းပြီးဖွံ့ဖြိုးတိုးတက်တဲ့နိုင်ငံတော်ကို ထူထောင်နိုင်ကြပါစေ။ မိသားစုတိုင်းလည်းပဲ မိမိတို့ရဲ့ဘဝမှာ ခရစ္စမတ်ရဲ့ ဝမ်းမြောက်ခြင်းကို ခံစားကြရပါစေ။

အားလုံးကိုမက်ရီးခရစ္စမတ်၊ ပျော်ရွှင်တဲ့ခရစ္စမတ်ကိုပိုင်ဆိုင်နိုင်ပါစေလို့ ဆုမွန်ကောင်းတောင်းလိုက်ပါတယ်။

#HomilyForChristmas,HisEminenceCharlesCardinalBo