အီစတာဆိုတာ ဘာတဲ့လဲ

အီစတာဆိုတာ ဘာတဲ့လဲ
@@@@@@@@@

ခရစ်ယာန်များ ကျင်းပနေသည့် အီစတာပွဲကို မည်သည့်အချိန်မှ စတင်ကျင်းပခဲ့ကြသည်ကို အတိအကျ ပြောထားခြင်းမရှိပါ။ သို့သော် ထိုစကားလုံးသည် ရဟန္တာဘိဒ် (St. Bede the Venerable) ၏ အဆိုအရ ဂျာမန် နွေဦးနတ်သမီး အက်စ်ထရယ် (Eostre or Eostrae) ၏အမည်မှ ဆင်းသက်လာသည်ဟု သိရသည်သည်။ တချို့ကလည်း အက်စ်ထရယ်၏ မူလစကားလုံးဖြစ်သည့် လက်တင်း စကား (Hebdomada Alba) ကို (White Weeks) အဖြူရောင် ရက်သတ္တပတ်များဟု နားလည်မူလွဲခဲ့ရာမှ ဖြစ်ပေါ်လာသည်ဟုလည်း ဆိုထားသည်။ အဖြူရောင် ရက်သတ္တပတ်များဟု ဆိုရခြင်းမှာ အီစတာ ရက်သတ္တပတ်တွင် ဆေးကြောခြင်းမင်္ဂလာခံယူသူများက အဖြူရောင် ၀တ်စုံများကို ဆင်မြန်းထားကြသည့်အတွက်ကြောင့် ဖြစ်သည်။ ခရစ်တော်ရှင်ပြန်ထမြောက်ချိန်တွင် သန့်ရှင်းမြင့်မြတ်သော အမျိုးသမီးများက ကိုယ်တော် ၏ဘုန်းဂုဏ်တော်အား ကိုယ်တိုင်ဖူးမြင်ခဲ့ရသည့်အတိုင်း Alba (White) ဟူသည့် လက်တင်းဘာသာစကားကို အမှောင်မှ အလင်း၊ သေခြင်းမှ ရှင်ပြန်ခြင်းကို သဘောဆောင်သည့် အမှောင်ဖြိုခွင်းသော ရောင်နီပျိုးစအချိန်ုဟု ဂျာမန်ဘာသာစကားဖြင့် ဘာသာပြန်လွဲမှား ခဲ့ရာမှ ဖြစ်ပေါ်လာသည်ဟုလည်း ဆိုကြသည်။

မည်သို့ပင် ဆိုစေကာမူ ခရစ်များအတွက်ကား အီစတာသည် လွန်ခဲ့သော နှစ် ၂၀၀၀ ကျော်က ခရစ်တော်ဘုရားရှင်၏ ပါစကားနက်နဲရာတည်းဟူသော ဒုက္ကရစရိယာခံခြင်း၊ အသက်စွန့်တော်မူခြင်းနှင့် ရှင်ပြန်ထမြောက်တော်မူ ခြင်းတို့ကို အောက်မေ့ကျင်းပသည့်ပွဲတော်ကြီးတစ်ခုပင် ဖြစ်သည်။ ထို့ကြောင့် ဤပွဲ တော်သည် ခရစ်ယာန်ပွဲတကာတို့ထက် အမြင့်မြတ်ဆုံးနှင့် အကြီးဆုံးသော ပွဲတော်ကြီးဖြစ်သည်။ ခရစ်တော်၏ သေခြင်း၊ ရှင်ပြန်ထမြောက်သာ မရှိခဲ့လျှင် ခရစ်ယာန်ဘာသာလည်း မရှိနိုင်တော့ချေ။ တမန်တော်ကြီး ရှင်ပေါလုက "ခရစ်တော်သည် ရှင်ပြန်ထမြောက်ခြင်း မရှိခဲ့ပါလျှင် ငါတို့၏ ဟောပြောခြင်းနှင့် ယုံကြည်ခြင်းသည် အချည်နှီး သက်သက်ပင်ဖြစ်သည်" ဟု မိန့်ခဲ့ပါသည်။ ခရစ်တော်၏ ရှင်ပြန်ထမြောက်ခြင်းသည် ခရစ်ယာန်ဘာသာဖြစ်လာ ခြင်း၏ အဓိက ဗဟိုချက်မကြီးတစ်ခု ဖြစ်သည်။

ထူးခြားသည်မှာ အီစတာ ဟူသော စကားလုံးသည် သမ္မာ ကျမ်းစာတွင် မတွေ့ရပေ။ ခရစ်တော် ဘုရားရှင်၏ သက်တော်စဉ်ကို ပေထက်အက္ခရာတင်ထားသော ဧဝံဂေလိကျမ်းစာစောင်တို့တွင် ရှင်ပြန်ထမြောက် ခြင်းပွဲတော်ကို ဂျူးလူမျိုးတို့၏ ပါစကားပွဲ (သို့) အီစရာအဲလ်လူမျိုးတို့၏ ကျွန်ဘ၀မှ လွတ်မြောက်ခြင်း( Passover) ပွဲနှင့် ဆက်နွယ်ရည်ညွန်းဖော်ပြထားပေသည်။ အတိုချုပ်ပြောရလျှင် အီစတာ (EASTER) ဟူသည် ခရစ်တော်ဘုရားရှင် သေခြင်းမှ ရှင်ပြန်ထမြောက်တော်မူသည့် ပွဲတော်မြတ်ကို ဆိုလိုခြင်း ဖြစ်သည်။ ရက်ပေါင်း ၄၀ ဝါတွင်းကာလကို ကျင့်ဆောက်တည်ကျော်ဖြတ်ခဲ့ကြပြီးနောက် ကျင်းပကြသည့် ပွဲတော်ဖြစ်သောကြောင့် ခရစ်တော်၏ ရှင်ပြန်ထမြောက်ခြင်းပွဲကို မြန်မာလို ဝါကျွတ်ပွဲဟူ၍လည်း ခေါ်ကြသေးသည်။ ထိုနေ့မှာ ခရစ်ယာန်များသည် ခရစ်တော်ရှင်ပြန်ထမြောက်သည့်ပွဲကို အောက်မေ့ကျင်းပကြလျှက် HAPPY EASTER ဟူ၍ ပျော်ရွှင် ၀မ်းမြောက်စွာ အချင်းချင်း နှုတ်ဆက်ဆုတောင်ပေးကြလေသည်။

+++ အားလုံးကို HAPPY EASTER +++
လို့ ဆုတောင်းနှုတ်ဆက်လိုက်ပါတယ်။

( Ref: Catholic Dictionary by Peter M.J Stravinshas )

သီကိုရှင်း

Add new comment

3 + 9 =