စည်းချက်မဲ့သော ညတစ်ည

စည်းချက်မဲ့သော ညတစ်ည

~~~~~~~~~~~~~~~~~

"Merry Christmas to you all" …

ခရစ္စမတ် ကယ်ရယ်သီချင်းဆိုထွက်သည့် လူငယ်အဖွဲ့၏ ခရစ္စမတ် နှုတ်ခွန်းဆက်သံက တိတ်ဆိတ်နေသော ဒေါ်မေရီတို့ မိသားစုလေးကို အံ့သြခြင်းများစွာဖြင့် လှုပ်နှိုးလိုက်ပါသည်။ ရေနှင့်ကြာ လှပလိုက်ဖက်လှ သလို ခရစ္စမတ်နှင့် ကယ်ရယ်သီချင်း ပနံတင့်လွန်းတယ်ဆိုတာ ခရစ်ယာန်ဖြစ်သူတိုင်းအသိပင်။ ဒီဇင်ဘာဆောင်းဝင်သည် နှင့် ကယ်ရယ်သီချင်းသံကို ခရစ်ယာန်မိသားများက မက်မက်မောမော မျှော်လင့်တောင့်တတတ်ကြသည်။ ခရစ္စမတ် ကယ်ရယ်သီချင်းသံတွေက ကြွမြန်းလာမယ့် မေတ္တာရှင် မက်ဆီးယားသခင်ရဲ့ မီးရှုးသန့်စင် လူ့အဖြစ်ယူတော်မူခြင်းကို ရှေ့ တော်ပြေးအဖြစ် ကန့်လန့်ကာဖွင့် နိဒါန်းပျိုးကြိုဆိုနေသလိုပင်။

သီချင်းဆို ရောက်လာသည့် လူငယ်အဖွဲ့ကို အိမ်ရှင်ဒေါ်မေရီနှင့် မိသားစုက နွေးထွေးစွာ ကြိုဆို ဖိတ်ခေါ်လိုက်သည်။

"ကဲ .. ကဲ သားတို့၊ သမီးတို့လာကြ၊ အိမ်ထဲကို ၀င်ကြနော်။ ဒီနှစ်တော့ ခရစ္စမတ်သီချင်းဆို မလာဖြစ်တော့ဘူးထင်နေတာ။ ပျော်လိုက်တာကွယ် .. ဘယ်လိုပြောရမှန်းတောင်မသိဘူး။ အန်တီ့အိမ် လာရင်တော့ Silent Night က မဆိုမဖြစ်ပဲနော် .. Silent Night ပြီးမှ ကြိုက်တဲ့သီချင်းပြန်ဆို .. ဟုတ်ပြီလား"

ဒေါ်မေရီက မိမိ ကြိုက်နှစ်သက်သော Silent Night ကို တောင်းဆိုလိုက်သည်။ လူငယ်များကလည်း အသင့်ဖြစ်ပြီဆိုတာနဲ့ ကမ္ဘာကျော် ကန္တ၀င်သီချင်းဖြစ်သည့် Silent Night ကို သံစုံညီညာစွာဖြင့် နှုတ်ဆက်တေး ဟစ်ကြွေးလိုက်သည်။ သီချင်းသံက ကြားရသူအဖို့ ကြည်နူးငြိမ်းချမ်းလှပေသည်။ ဒီနှစ်တော့ မကြားရတော့ဘူးလို့ ထင်မှတ်ထားသည်မို့ မမျှော် လင့်ဘဲ ကြားလိုက်ရသည့်အခါ ခရစ္စမတ်သီချင်းသံကို ဆာငတ်သူတစ်ယောက် ရေငတ်နေချိန် ရေအေးလေးတစ်ခွက် လောက် သောက်လိုက်ရသလို အရသာ ရှိလွန်းလှသည်။

Silent Night ဆိုပြီးသည့်နောက် ဒုတိယသီချင်းတစ်ပုဒ်ကို လူငယ်ခေါင်းဆောင်းက ရွေးချယ်ပြီး သီချင်းခေါင်းစဉ်ကို တိုင်ပေးလိုက်သည်။ "ငြိမ်းချမ်းခြင်းအလင်း " .. ။ သီချင်းခေါင်းစဉ်ကြားလိုက်သည့်နှင့် ဒေါ်မေရီတို့မိသားစု ကြက်သီးမွေးညင်းများပင် ထသွားသည်။ မျက်ရည်များလည်း မျက်လုံးအိမ်၌ စို့တက်လာသည်။ သီချင်းစာသားတွေက အဓိပ္ပါယ် ရှိလှ၏။

" . . . လူတွေများရဲ့ အလင်း (မျှော်နေသူများအတွက်) ၊ ကမ္ဘာတစ်ဝှမ်းရဲ့ အလင်း (အားငယ်နေသူများအတွက်) . . . ယေဇူးရှင် ကြွလာပြီ ( လူတွေကယ်ဖို့) ငြိမ်းချမ်းခြင်းအတွက် အလင်းထွန်းလင်းပြီ . . . "

ခရစ္စမတ်သီချင်းဆိုနေကြသည့် လူငယ်အဖွဲ့၏ သီချင်းများကို နားဆင်ရင်း ဒေါ်မေရီတို့မိသားစုက အားရပါးရ လက်ခုပ်တီး၍ အားပေးကြသည်။ ဘုရားရှင်သည် ငြိမ်သက်ခြင်းအရှင် . . မေတ္တာတော်အရှင် .. ဒီကမ္ဘာမြေပေါ် ငြိမ်သက်ခြင်းတွေ သက်ရောက်ဖို့၊ ဘုရားရှင်၏ မေတ္တာတော်တွေ ခံစားရရှိဖို့ လူတွေနဲ့အတူ နေချင်လွန်းသည့် ဘုရားရှင်သည် နှိမ့်ချစွာဖြင့် နွားစားခွက်၌ လူ့အဖြစ်ကို ယူခဲ့လေသည်။ သီချင်းကို နားထောင်ရင်း ဘုရား၏ လူ့အဖြစ်ယူခြင်းကို ဒေါ်မေရီ အတွေးပွားနေစဉ်တွင် . . .

" ဒိုင်း . . ဒိုင်း . . ."

စည်းချက်ညီညီနှလုံးသားထဲ စိမ့်ဝင်ခံစားလို့ ကောင်းနေခိုက် သေနတ်သံနှစ်ချက်ကို ရုတ်တရက် ကြားလိုက်ရသည်။ စည်းချက်မှန်နေသော သီချင်းတစ်ပုဒ်မှာ နားထဲတွင် အကျည်းတန်စွာ စည်းချက် ယိုင်သွားလေပြီ။ ကြားလိုက်ရသည့် သေနတ်သံက တော်တော်လှမ်းပုံရသည်။ ဆိုနေတာက ငြိမ်းချမ်းရေးသီချင်း။ ရောက်နေတာက အပစ်အခတ်တွေနှင့် မငြိမ်းချမ်းသည့်နေရာ။ သြော် . . . ငြိမ်းချမ်းရေးအတွက် လက်နက်ဖြစ်ပါစေလို့ ရဟန္တာ ဖရန်စစ် အစီစီ တောင်းခဲ့တဲ့ ဆုဟာ ဒါမျိုးတော့ မဟုတ်ကောင်းဘူး ထင်ပါရဲ့။ ငြိမ်းချမ်းရေးအတွက် တိုက်နေတာ မှန်ပေမဲ့ သေနတ်တွေကတော့ ငြိမ်းချမ်းရေးလက်နက် ဘယ်လိုမှ ဖြစ်လာနိုင်မှာ မဟုတ်ပါဘူး။ ဒေါ်မေရီ တဒင်္ဂ အတွေးများ ဖြန့်ကျက်လို့နေသည်။ ဆက်လက်ပြီး လူငယ်များမှလည်း စည်းချက်ယိုင်သွားသည့် သီချင်းကို ပြန်လည်တည့်မတ်ကာ အတတ်နိုင်ဆုံး အကောင်းဆုံး သီဆို၍ နှုတ်ဆက်လိုကကြသည်။ သီချင်းဆိုပြီးသည့်နောက် အိမ်သူအိမ်သားများကို Merry Christmas လိုက်နှုတ်ဆက်ကြသည်။

"နေပါဦး .. အစတုန်းက နိုင်ငံရေးအခြေအနေမကောင်းလို့ ကယ်ရယ်သီချင်းဆို မထွက်ရတော့ဘူးလို့ ကြားထားတာ။ အန်တီဖြင့် ပျော်ကို မပျော်ဘူး။ စိတ်မကောင်းတွေဖြစ်နေရတာ။ ဘယ်လိုဖြစ်ပြီး အခု ကယ်ရယ်ထွက်ခွင့်ရသွားတာလဲ . ."

ဒေါ်မေရီမှ သူ့အား နှုတ်ဆက်လာသည့် လူငယ်ခေါင်းဆောင် ခရစ္စတိုဖာ ကို မေးလိုက်လေသည်။

" ဘုရားကျေးဇူးတော်လို့ပဲ ပြောရတော့မယ် အန်တီရေ . . ဒါတောင် သိပ်ကြာလို့ မရဘူး။ (၁၀) နာရီ နောက်ဆုံးလို့ အမိန့်ထုတ်ထားတယ်။ အခုလည်း ကြည့်ပါလား . . ။ အိမ်ရှေ့မှာ ကိုယ်ရံတော်တွေပါလာတယ်။ ကျွန်တော်တို့ကို စောင့်ကြပ်ဖို့ ထည့်ပေးလိုက်တာလေ . ."

လူငယ်ခေါင်းဆောင် ခရစ္စတိုဖာက ပြောရင်း အိမ်ရှေ့ကို မေးငေါ့ပြလိုက်သည်။

"အို . . . ဟုတ်ပါရဲ့တော်. . . ငြိမ်းချမ်းရေး လက်နက်ကြီးတွေနဲ့ပါလား "

ဒေါ်မေရီလည်း တအံ့တသြနှင့် ပြောလိုက်တော့မှ လူငယ်များအားလုံး အိမ်ရှေကို လှည့်ကြည့်လိုက်လေသည်။ ခြံရှေ့ တံခါးဝမှာ စစ်ယူနီဖောင်းအပြည့်နှင့် စစ်သားနှစ်ယောက် ရပ်စောင့်နေကြသည်။ ပါးစပ်ကလည်း ဆေးလိပ်တွေ ဖွာရှိုက်ရင်း သူတို့အချင်းချင်း စကားပြောနေကြသည်။ လက်ထဲမှာလည်း သေနတ်တွေကိုယ်စီနှင့် ။

" အို ငြိမ်းချမ်းခြင်းအရှင်ရယ် . . အမြန်သာကြွမြန်လာပြီး ငြိမ်းချမ်းခြင်းတွေ ပေးလှဲ့ပါတော့"

၀မ်းနည်းမှု၊ အားကိုးမှုတွေအပြည့်နှင့် ဒေါ်မေရီ ရင်ထဲမှ ဆုတောင်းမေတ္တာ ပြုလိုက်ပါသည်။ ထိုအခိုက် သေနတ်သံ တစ်ချက် ဝေဟင်ထက်တွင် ထွက်ပေါ်လာပြန်သည်။

" ဒိုင်း . . ." ။

အေးချမ်းနေသည့်ဆောင်းညချမ်းကို ထိုးဖောက်ကာ မြည်ဟီးသွားလေသည်။ ဆောင်းညချမ်းမှာ သေနတ်သံနှင့် ခရစ္စမတ်သီချင်းသံ အသံနှစ်ခု ဝေဟင်ထက်တွင့် လွင့်ပျံ နေပါ သည်။ သီချင်းသံနှင့် သေနတ်သံ ဘယ်သူကများ ငြိမ်းချမ်းရေးနှင့် စည်းချက်ညီ ပနံရမလဲဆိုတာ လူငယ်တွေရဲ့ နှလုံးသား ထဲမှာ အတွေးပွားနေလေပြီ။ စစ်မက်ဖြစ်ပွားရာ မငြိမ်းချမ်းတဲ့ ဒေသမှာ နေထိုင်ကြတဲ့ သူတို့အတွက် အဲ့ဒီ ဆောင်းည လေးတစ်ညဟာ စည်းချက်တွေ မဲ့ပြီးရင်း မဲ့နေတဲ့ ညလေးတစ်ည မဖြစ်ပါစေနဲ့ဟု ဆုတောင်းလိုက်ပါတော့သည်။

သီကိုရှင်း

Add new comment

2 + 0 =